بلوچ مظاہرین کے ساتھ مذاکرات جاری ہیں ، وزیر اطلاعات

اطلاعات و نشریات کے نگران وزیر مرتضیٰ سولنگی نے کہا  کہ اسلام آباد میں بلوچ مظاہرین کے ساتھ مذاکرات کے ذریعے ان کے تمام حقیقی خدشات کا پُرامن حل تلاش کیا جائے گا۔ایک نجی نیوز ٹی وی چینل کو انٹرویو دیتے ہوئے انہوں نے کہا کہ بات چیت کے ذریعے ان کے تحفظات دور کرنے اور انہیں عزت و احترام اور حفاظت کے ساتھ گھروں کو واپس بھیجنے کی کوششیں جاری ہیں۔

انہوں نے کہا کہ بلوچستان کے مظاہرین میں زیادہ تعداد خواتین کی ہے۔ انہوں نے کہا کہ دو روز پہلے حراست میں لی گئی خواتین کو رہا کر دیا گیا ہے۔

نگران وفاقی وزیراطلاعات  نے مزید کہا کہ اس وقت ایک سوتریسٹھ زیر حراست افراد کی رہائی کا عمل جاری ہے۔وزیر اطلاعات ونشریات نے اس بات پر زور دیا کہ ہر فرد کو پرامن احتجاج کاحق حاصل ہے اور حکومت مظاہرین کی دیکھ بھال کو یقینی بنا رہی ہے۔

انہوں نے کہا کہ مظاہرین کے لئے سیکیورٹی، ایمبولینس اور طبی سہولیات موجود ہیں۔مرتضیٰ سولنگی نے یقین د ہانی کرائی کہ بلوچستان سے آنے والے مظاہرین کو ان کے سفر کے دوران کہیں نہیں روکا گیا اور ان کے ساتھ عزت سے پیش آیاگیا۔