جہانگیر ترین گروپ کی تشکیل ،وزیراعلیٰ پنجاب سیاسی محاذ پر متحرک

تفصیلات کے مطابق وزیراعلیٰ عثمان بزدار نے گزشتہ48گھنٹے میں   50 سے زائد ارکان پنجاب اسمبلی سے ملاقاتیں  کی ہیں ، وزیراعلیٰ سے ملاقات کرنے والوں میں  ترین گروپ اورہم خیال گروپ کےا رکان بھی شریک ہوئے ۔وزیراعلیٰ نے  صبح  10سے 11بجے  تک کاوقت ا رکان اسمبلی کے لئے  مقرر کردیا،بغیر وقت لئے صبح 10سے 11بجے تک ارکان وزیراعلیٰ سے ملاقات کرسکتے ہیں۔ وزیراعلیٰ پنجاب عثمان بزدار نے اراکین اسمبلی سے ملاقات میں  واضح کردیا کہ  کسی کیخلاف انتقامی کارروائی کاسوال ہی پیدا نہیں ہوتا، ہمیشہ ارکان اسمبلی کوساتھ لےکرچلا ہوں ، ارکان اسمبلی کی مشاورت سےحکومتی امور کے اہم فیصلے کئےجاتے ہیں۔  

وزیراعلی  نے  ملاقاتوں میں ارکان سے بات چیت کرتے ہوئے کہاکہ   ہر شہر کو ترقیاتی پیکیج دے رہے ہیں ۔ وزیراعلیٰ سے صوبائی وزیر خزانہ ہاشم جواں بخت،ارکان صوبائی اسمبلی آصف مجیداورمحمد شفیع  نے بھی  ملاقات کی ،   اس موقع پر وزیراعلی ٰ پنجاب کاکہنا تھا کہ رحیم یار خان سمیت جنوبی پنجاب کے دوردراز علاقوں کوترقی کے دھارے میں لانے کے لئے فنڈزکی غیر منصفانہ تقسیم کی روایت کو ختم کردیا ہے۔ جلد رحیم یار خان کا دورہ کروں گا۔پاکستان تحریک انصاف وزیراعظم عمرا ن خان کی قیادت میں متحد ہے۔ پروپیگنڈا کرنے والے عناصرمخصوص ایجنڈا لےکرچل رہے ہیں،موقع پرست عناصرکی کوئی سازش کامیاب نہیں ہوگی سیاست عوام کی خدمت کا نام ہے۔الزامات کی سیاست کی اور نہ کریں گے۔ وزیراعلیٰ عثمان بزدار نے مزید کہا کہ  پنجاب میں کسی کے خلاف انتقامی کارروائی نہیں کی، شفافیت،میرٹ،انصاف اورقانون کی عمل داری پر یقین رکھتے ہیں ۔

علاوہ ازیں وزیراعلیٰ پنجاب عثمان بزدارنے اپنی سیاسی ٹیم کاآج  مشاورتی اجلاس بلا لیا ، وزیراعلیٰ کی زیرصدارت سیاسی ٹیم کااجلاس  آج دوپہرایوان وزیر اعلیٰ میں ہوگا۔وزیراعلیٰ سیاسی ٹیم کےساتھ  سیاسی صورتحال پرمشاورت کریں گے ، وزیرقانون راجہ بشارت،وزیرصنعت اسلم اقبال شریک ہوں گے ، وزیرزراعت حسین جہانیاں گردیزی،وزیرتوانائی اخترملک ،وزیرخزانہ پنجاب ہاشم جواں بخت اوردیگراہم وزرا بھی سیاسی میٹنگ میں شریک ہوں گے۔

واضح رہے کہ جہانگیر ترین کے حمایتی ارکان نے پنجاب اسمبلی میں الگ نشستوں پر بیٹھنے کا فیصلہ کیا ہے۔

یاد رہے کہ ایک روزقبل  جہانگیر ترین گروپ کا باقاعدہ اعلان کیا گیا تھا، گروپ کا نام ’جہانگیر ترین ہم خیال گروپ’ رکھا گیا ہے، جہانگیر ترین گروپ نے قومی اور صوبائی اسمبلی میں پارلیمانی لیڈر بھی مقرر کردیے۔ ایم این اے راجہ ریاض قومی اسمبلی میں پارلیمانی لیڈر ہوں گے، پنجاب اسمبلی میں سعید اکبر نوانی جہانگیر ترین گروپ کے پارلیمانی لیڈر ہوں گے۔