مومنہ مستحسن بھی کورونا وائرس میں مبتلا

تفصیلات کے مطابق  گلوکارہ مومنہ مستحسن  نے کورونا مثبت آنے سے متعلق  مداحوں کو فوٹوز اینڈ ویڈیوز شیئرنگ ایپ انسٹاگرام  کے ذریعے آگاہ کیا۔مومنہ نے انسٹاگرام اسٹوری پر بتایا کہ ان کا کورونا وائرس ٹیسٹ مثبت آیا ہے، جبکہ انھوں نے اپنی تصویر بھی اس اسٹوری میں شیئر کی۔

مومنہ نے   اپنے پیغام میں کہا کہ  اس تصویر میں چہرے پر نا ہی کوئی میک اپ کیا ہوا ہے اور نا کوئی فلٹر لگایا گیا ہے، بس صرف کوویڈ ہے ۔انہوں نے مداحوں کو اس عالمی وبا سے محفوظ رہنے کا بھی مشورہ دیا۔

خیال رہے کہ گزشتہ دنوں سینئر اداکارہ بشریٰ انصاری کی بہن سنبل شاہد کورونا وائرس کے باعث انتقال کرگئی تھیں۔

اس سے قبل   پاکستانی شوبز انڈسٹری کی بہت سی شخصیات وبا کا شکار ہوچکی ہیں جن میں مرینہ خان ،  آمنہ الیاس، بہروز سبزواری، اداکارہ روبینہ اشرف، گلوکار جواد احمد، عثمان مختار، ندا یاسر، ماڈل علیزے گبول، صحیفہ جبار، امیر گیلانی، سنبل شاہد، مریم نفیس اور واسع چوہدری سمیت دیگر شامل ہیں۔

واضح رہے کہ گزشتہ 24 گھنٹوں میں کورونا سے مزید131فراد چل بسے ۔ ملک میں  اموات کی مجموعی تعداد 19 ہزار987ہوگئی ہے،جبکہ  متاثرہ افراد کی مجموعی تعداد 8 لاکھ 90ہزار 391ہو گئی ہے ۔