ملک میں پانی کابحران سنگین ، ارسا نے صوبوں کو خبردار کر دیا

تفصیلات  کے مطابق ملک میں پانی کا بحران شدت اختیارکرگیا ہے اور ہر گزرتے دن   صورتحال خطرناک  ہوتی جارہی ہے، انڈس ریور سسٹم اتھارٹی  (ارسا) کےمطابق تربیلا اور منگلا ڈیموں میں پانی کا ذخیرہ 8 دن کا رہ گیا ہے اور  صوبوں کو پانی کا شارٹ فال 25 سے 30 فیصد تک پہنچ سکتا ہے۔ ارسا نے صوبوں کو پانی کی قلت کے حوالے سے خبردار کر دیا۔ 

ارسا کے مطابق اس وقت پنجاب اور سندھ کو 18 فیصد شارٹ فال کا سامنا ہے،گلیشئرز پر درجہ حرارت نہ بڑھنے سے صورتحال سنگین ہوسکتی ہےلہذا حالات نارمل ہونے تک پانی کے استعمال میں احتیاط برتی جائے۔ارسا کاکہنا ہے کہ  تربیلا ڈیم سے پانی کا ذخیرہ تیزی سے استعمال ہو رہا ہے  اور  ڈیم میں پانی کا ذخیرہ 2لاکھ ایکڑ فٹ رہ گیا ہے ۔ تربیلا ڈیم میں پانی کی آمد 59 ہزار اور اخراج 65 ہزار کیوسک ہے۔ منگلا ڈیم میں پانی کا ذخیرہ 6 لاکھ ایکڑ فٹ رہ گیا۔ منگلا ڈیم میں پانی کی آمد 50ہزار اور اخراج 58 ہزار کیوسک ہے۔