گوجرانوالا کینٹ پرحملہ اور جلاؤ گھیراؤ، عدالت کا 51 ملزمان کی جائیداد ضبط کرنے کا حکم

گوجرانوالا کینٹ پر نو مئی کو ہوئے حملہ اور جلاؤ گھیراؤ کے کیس میں عدالت نے 51 ملزمان کی جائیداد ضبط کرنے کا حکم دے دیا، عدالت نے دفعہ 88 کے تحت ملزمان کی جائیدادیں ضبط کرنے کا حکم دیا۔

عدالتی حکم پر مذکورہ 51 ملزمان کو اشتہاری قرار دینے کی کارروائی جاری ہے۔ مذکورہ 51 ملزمان کی فہرست میں پی ٹی آئی کے مراد سعید، حماد اظہر، فرخ حبیب، عمر ایوب،علی امین گنڈا پور اور زرتاج گل اور زین قریشی کے نام بھی شامل ہیں۔

اس کے علاوہ زبیر نیازی، اکرم ساہی، شوکت بھٹی، احمد چٹھہ، بلال اعجاز اور ظفر اللہ چیمہ کے نام بھی اس فہرست میں شامل ہیں۔

عدالتی حکم پر ملزمان کے گھروں اور شہروں کے اہم مقامات پر اشتہار آویزاں کردیے گئے ہیں۔عدالت نے ملزمان کے ناقابل ضمانت وارنٹ جاری کر رکھے ہیں۔

خیال رہے کہ 9 مئی کے مقدمےمیں بانی پی ٹی آئی عمران خان، شاہ محمود قریشی، پرویز الہٰی، یاسمین راشد اور اعجاز چوہدری بھی ملزم نامزد ہیں تاہم پانچوں شخصیات زیر حراست ہیں۔