شیخ رشید کے کاغذات نامزدگی مسترد کئے جانے کے خلاف اپیل سماعت کے لیے منظور

راولپنڈی کے الیکشن ٹربیونل نے عوامی مسلم لیگ کے سربراہ شیخ رشید کے کاغذات نامزدگی مسترد کئے جانے کے خلاف اپیل سماعت کے لیے منظور کرلی، پاکستان تحریک انصاف کے 8 امیدواروں کی اپیلوں پر آر او سمیت شکایت کنندہ کو نوٹس جاری کردیئے گئے جبکہ سماعت 4 جنوری کو ہوگی۔

الیکشن ٹربیونل نے این اے 56 اور57 سے کاغذات نامزدگی مسترد کئے جانے کے خلاف شیخ رشید اور ان کے بھتیجے راشد شفیق کی اپیلیں سماعت کے لیے منظور کیں۔ الیکشن ٹریبونل نے نوٹس جاری کرتے ہوئے ریٹرننگ آفیسر (آر او) کو 4 جنوری تک ریکارڈ سمیت طلب کرلیا۔

تحریک انصاف کے این اے 55 اورپی پی 15 کے تین امیدوارخلیق کیانی،ایرج شاہنواز راجہ اور انعم زاہد نے ریٹرنگ آفیسر کے فیصلے کے خلاف اپیلیں دائر کیں جبکہ الیکشن ٹربیونل نے اپیلیں منظور کرتے ہوئے نوٹس جاری کردیئے۔

این اے 89 میانوالی سے پی ٹی آئی امیدوارعمیر نیازی نے اپلیٹ ٹربیونل سے رجوع کیا۔ عدالت نے ریٹرننگ آفسر اوراعتراض کندہ کوطلب کرلیا۔ حلقہ این اے 58،59 اور60 سے تحریک انصاف کے میجر طاہر صادق اور ایمان طاہر نے اپیلیں دائر کی جبکہ الیکشن ٹربیونل نے اپیلیں منظورکرتے ہوئے نوٹس جاری کردیئے۔

تحریک انصاف کے بشارت راجہ کی این اے 55 سے اپیل بھی سماعت کے لیے منظور کرلی گئی۔اس کے علاوہ پی پی 17 سے پی ٹی آئی کے راجہ راشد حفیظ کی اپیل منظور کرتے ہوئے نوٹس جاری کئے۔