غیرشرعی نکاح کیس ،بانی چیئرمین پی ٹی آئی اور بشریٰ بی بی کے خلاف گزشتہ سماعت کا تحریری حکمنامہ جاری

ڈسٹرکٹ اینڈ سیشن کورٹ اسلام آباد نے غیر شرعی نکاح کیس کی گزشتہ سماعت کا حکم نامہ جاری کر دیا۔

سول جج قدرت اللّٰہ نے فرد جرم عائد کرنے کی تاریخ مقرر کرنے کا تحریری حکم نامہ جاری کرتے ہوئے سپرنٹنڈنٹ جیل کو صحافیوں کی کمرہ عدالت میں موجودگی یقینی بنانے کے عدالتی فیصلے پر عملدرآمد کا حکم دیا ہے۔

حکم نامے میں کہا گیا ہے کہ مقدمے سے متعلق تمام دستاویزی کاپیاں بانی چیئرمین پی ٹی آئی اور بشریٰ بی بی کو فراہم کی جائیں، عمران خان اور بشریٰ بی بی پر فرد جرم 10 جنوری کو عائد کی جائے گی۔

عدالت نے کہا کہ بانی چیئرمین پی ٹی آئی عمران خان اور بشریٰ بی بی کے وکلاء نے پبلک اور صحافیوں کی وافر تعداد کو عدالت تک رسائی کی استدعا کی۔ حکم نامے میں کہا گیا کہ سکیورٹی اور کمرہ عدالت کی گنجائش کے مطابق صحافیوں کی تعداد کا تعین کرنا سپرنٹنڈنٹ جیل کا اختیار ہو گا۔