ٹی ٹوئنٹی ورلڈ کپ 2024 کا شیڈول جاری

لاہور: ٹی ٹوئنٹی ورلڈ کپ کے شیڈول کا اعلان کر دیا گیا ہے، جس میں پاکستان کے تمام میچز کی تاریخوں کا اعلان کر دیا گیا ہے، جس میں روایتی حریف بھارت کے ساتھ 9 جون کو تاریخی مقابلہ بھی شامل ہے۔

 آئندہ سال  یکم جون سے 29 جون تک شیڈول آئی سی سی ٹی ٹوئنٹی ورلڈ کپ کی تفصیلات کے مطابق ویسٹ انڈیز اور امریکا ٹورنامنٹ کے نویں ایڈیشن کی میزبانی کریں گے، جس میں ویسٹ انڈیز اور امریکا کے نو مختلف مقامات پر 55 میچز کھیلے جائیں گے۔

ایونٹ میں 20 ٹیمیں شرکت کریں گی جنہیں چار ٹیموں کے پانچ گروپس میں تقسیم کیا گیا ہے۔ ہر گروپ سے ٹاپ دو ٹیمیں سپر 8 مرحلے کے لیے کوالیفائی کریں گی۔ اس کے بعد سپر 8 مرحلے میں ہر دو گروپوں میں سے ٹاپ دو ٹیمیں سیمی فائنل میں جگہ پکی کر لیں گی۔

پاکستان اور بھارت کو آئرلینڈ، امریکہ اور کینیڈا کے ساتھ ایک ہی گروپ (گروپ اے) میں رکھا گیا ہے۔ گروپ بی میں انگلینڈ، آسٹریلیا، نمیبیا، سکاٹ لینڈ اور عمان شامل ہیں۔ گروپ سی میں نیوزی لینڈ، ویسٹ انڈیز، افغانستان، یوگنڈا اور پاپوا نیو گنی شامل ہیں جبکہ گروپ ڈی میں جنوبی افریقہ، سری لنکا، بنگلہ دیش، نیدرلینڈز اور نیپال شامل ہیں۔

ٹی ٹوئنٹی ورلڈ کپ کے گروپ مرحلے کے میچز یکم جون سے 18 جون تک ہوں گے، سپر ایٹ مرحلے کے مقابلے 19 جون سے 24 جون تک ہوں گے اور سیمی فائنلز 26 اور 27 جون کو شیڈول ہیں۔ 

پاکستان اپنا پہلا گروپ میچ 6 جون کو امریکہ کے خلاف کھیلے گا، اور پاکستان بمقابلہ بھارت کا انتہائی متوقع میچ 9 جون کو نیویارک میں شیڈول ہے۔ قومی ٹیم 11 جون کو نیویارک میں کینیڈا اور 16 جون کو فلوریڈا میں آئرلینڈ سے ٹکرائے گی۔