انتخابی نشان، الیکشن کمیشن کا پشاور ہائیکورٹ کا فیصلہ سپریم کورٹ میں چیلنج

الیکشن کمیشن نے پاکستان تحریک انصاف (پی ٹی آئی) کو بلے کا انتخابی نشان واپس دینے کا پشاور ہائیکورٹ کا فیصلہ سپریم کورٹ میں چیلنج کردیا۔

الیکشن کمیشن پشاور ہائیکورٹ کے فیصلے کے خلاف سپریم کورٹ پہنچ گیا اور پی ٹی آئی کو بلے کا انتخابی نشان واپس دینے کے فیصلے کے خلاف سپریم کورٹ سے رجوع کرلیا۔

الیکشن کمیشن نے درخواست میں کہا کہ پی ٹی آٸی نے انٹر پارٹی انتخابات الیکشن ایکٹ کے تحت نہیں کروائے۔

درخواست میں استدعا کی گئی کہ پشاور ہائیکورٹ کا فیصلہ آئین اور قانون کے خلاف ہے، ہاٸیکورٹ کا فیصلہ کالعدم قرار دیا جائے۔

سپریم کورٹ کی جانب سے الیکشن کمیشن کی اپیل کو ڈائری نمبر 657 لگا دیا گیا۔

دوسری طرف پی ٹی آئی کو بلے کا انتخابی نشان الاٹ کرنے کے خلاف الیکشن کمشین کی درخواست پر رجسٹرار آفس نے اعتراض لگا دیا، اعتراض میں کہا گیا کہ اپیل کے ساتھ منسلک دستاویزت پڑھے جانے کے قابل نہیں ہیں۔

گزشتہ روز پشاورہائیکورٹ نے الیکشن کمیشن کا فیصلہ معطل کرتے ہوئے پی ٹی آئی کو بلے کا نشان واپس دینے کا فیصلہ دیا تھا اور الیکشن کمیشن کو حکم دیا تھا پی ٹی آئی کو سرٹیفکیٹ جاری کرنے کا فیصلہ ویب سائٹ پر بھی جاری کیا جائے۔