صوابی میں فائرنگ سے پی ٹی آئی کے رہنما شاہ خالد جاں بحق

خیبرپختونخوا کے شہر صوابی میں دن دیہاڑے فائرنگ سے پی ٹی آئی کے ضلعی رہنما اور مقامی کاروباری شخصیت شاہ خالد جاں بحق ہوگئے۔

پولیس کے مطابق دو نامعلوم موٹرسائیکل سواروں نے شاہ خالد کی گاڑی پر فائرنگ کی۔ گاڑی پر فائرنگ کرنے والے ملزمان فرار ہوگئے جن کی تلاش کیلئے کارروائی کی جارہی ہے۔

اطلاع ملتے ہی پولیس کی نفری جائے وقوع پر پہنچی اور شواہد جمع کرکے لاش اسپتال منتقل کی۔ پولیس نے واقعے کی تحقیقات شروع کردی ہے۔

واضح رہے کہ گزشتہ روز بھی پختونخوا میں شمالی وزیرستان کے علاقے میرانشاہ کے گاؤں تپی میں نامعلوم افراد کی فائرنگ سے صوبائی اسمبلی کے امیدوار سمیت 3 افراد جاں بحق ہو گئے تھے۔