حکومت گردشی قرضے میں کمی لانے کیلئے ہر ممکن اقدامات اٹھا رہی ہے، نگران وزیر اعظم

نگران وزیرِ اعظم انوار الحق کاکڑ نے کہا ہے کہ حکومت گردشی قرضے میں کمی لانے کیلئے حکومت ہر ممکن اقدامات اٹھا رہی ہے، وزارت توانائی گردشی قرضےکے خاتمے کیلئے ایک مؤثر، دیرپااور قابل عمل حکمت عملی بنا کر پیش کرے، گردشی قرضے میں کمی لانے کیلئے تمام فریقین کو مل کر کام کرنا ہوگا۔

نگران وزیرِ اعظم انوار الحق کاکڑ کی زیرِ صدارت توانائی کے شعبے میں گردشی قرضے میں کمی کے لائحہ عمل پر جائزہ اجلاس منعقد ہوا۔ اجلاس میں نگران وفاقی وزراء ڈاکٹر شمشاد اختر، محمد علی اور متعلقہ اعلیٰ حکام نے شرکت کی۔

نگران وزیراعظم نے کہا کہ حکومت سنبھالتے ہی ہم نے ترجیحی بنیادوں پر معیشت کی بحالی کیلئے اقدامات کئے، گردشی قرضے میں کمی لانے کیلئے حکومت ہر ممکن اقدامات اٹھا رہی ہے۔ انہوں نے وزارت توانائی کو ہدایت کی کہ گردشی قرضےکے خاتمے کیلئے ایک مؤثر، دیرپااور قابل عمل حکمت عملی بنا کر پیش کی جائے۔ انہوں نے کہا کہ گردشی قرضے میں کمی لانے کیلئے تمام فریقین کو مل کر کام کرنا ہوگا، انسدادِ بجلی چوری آپریشن سے بجلی کی تقسیم کار کمپنیوں کی وصولیوں میں خاطر خواہ بہتری آئی ہے۔