نگراں وزیر خزانہ شمشاد اختر کے خلاف درخواست دائر

کراچی: سندھ ہائی کورٹ میں وفاقی نگراں وزیر خزانہ شمشاد اختر کے خلاف درخواست دائر کر دی گئی۔

تفصیلات کے مطابق ڈیفنس ہاؤسنگ اتھارٹی (ڈی ایچ اے) کے رہائشی عمر خالد نے درخواست میں موقف اختیار کیا کہ شمشاد اختر وفاقی وزیر کے علاوہ دیگر محکموں کے بورڈز کی ممبر بھی ہیں، اور مختلف اداروں سے گرانٹس لے رہی ہیں۔

سماعت کے دوران درخواست گزار کے وکیل عاصم اقبال ایڈووکیٹ نے کہا کہ وضاحت مانگی جائے کہ شمشاد اختر کس قانون کے تحت یہ کام کر رہی ہیں۔

جس پر جسٹس جنید غفار نے جواب دیا کہ وفاقی وزیر کو اگست میں تعینات کیا گیا تھا، آپ عدالت میں تاخیر سے آئے، ہم اطلاع دیں گے، جب تک معاملے کا جواب نہیں آتا، کابینہ تحلیل کردی جائے گی ، وکیل عاصم اقبال نے کہا کہ کابینہ تحلیل ہو جائے گی لیکن قانون کی خلاف ورزی اپنی جگہ رہے گی۔

عدالت نے درخواست کی سماعت 13 فروری تک ملتوی کر دی ، درخواست میں صدر، اسٹیبلشمنٹ ڈویژن، کیبنٹ ڈویژن، اسٹاک ایکسچینج، سوئی سدرن گیس کمپنی (ایس ایس جی سی) اور دیگر کو فریق بنایا گیا ہے ۔