پی ٹی آئی کا سینیٹر سیف اللہ ابڑو کو پارٹی پالیسی کی خلاف ورزی پر شو کار نوٹس جاری

پاکستان تحریک انصاف (پی ٹی آئی) کی جانب سے سینیٹر سیف اللہ ابڑو کو پارٹی پالیسی کی خلاف ورزی اور چیئرمین پیپلز پارٹی بلاول بھٹو زرداری کے حق میں دستبرداری پر شوکاز نوٹس جاری کیا گیا۔

Show cause notice has been issued to Senator Saif Ullah Abro for violating party’s policy pic.twitter.com/vhn6oMN8KE

— PTI (@PTIofficial) January 26, 2024

نوٹس میں  کہا گیا کہ پارٹی قیادت کے علم میں آیا ہے کہ آپ نے پارٹی پالیسی کی خلاف ورزی کی ہے، سیف اللہ ابڑو نے بلاول بھٹو کے حق میں پارٹی ٹکٹ سے دستبرداری کا اعلان کیا۔ سیف اللہ ابڑو سینیٹ آف پاکستان میں پارٹی کے ٹکٹ پر سینیٹر منتخب ہوئے، تحریک انصاف نے سیف اللہ ابڑو کو 2024 کے عام انتخابات میں حصہ لینے کے لیے پارٹی ٹکٹ سے نوازا۔

نوٹس میں یہ بھی کہا گیا کہ پارٹی ڈسپلن کی سنگین خلاف ورزی کرنے پر سیف اللہ ابڑو کو شوکاز نوٹس دیا جاتا ہے، سیف اللہ ابڑو پارٹی کو تین دن کے اندر وضاحتی بیان جمع کرائیں، جواب نہ دینے کی صورت میں پارٹی پالیسی اور قواعد و ضوابط کے مطابق مزید کارروائی کی جائے گی۔

اس سے قبل پی ٹی آئی کے سینیٹر سیف اللہ ابڑو نے چیئرمین پاکستان پیپلز پارٹی بلاول بھٹو زرداری سے ملاقات کر کے ان کے حق میں دستبرداری کا اعلان کیا تھا۔