موقع ملا تو ملک کی تقدیر بدل دیں گے ،مریم نواز کا جلسہ سے خطاب

پاکستان مسلم لیگ (ن) کی سینئر  نائب صدر مریم نواز نے کہا ہے کہ ملک کے چپے چپے پر نوازشریف کی خدمت کے نشان ابھی بھی باقی ہیں۔

پاکستان مسلم لیگ (ن) کی نائب صدر اور چیف آرگنائزر مریم نواز  نے ایبٹ آباد میں ن لیگ کے جلسے سے خطاب کرتے ہوئے کہا کہ ہم نے بہت محنت سے منشور بنایا، ہم نے پورا منصوبہ بنالیا ہے کہ آٹا، چینی، سبزی، دالوں کی قیمتیں کیسےکم کرنی ہے۔نوازشریف نے پلان بنالیا ہے کہ بجلی30 فیصد سستی کیسےکرنی ہے،انہوں نے جلسہ سے خطاب کرتے ہوئے کہا کہ  آپ عوام  موقع دیں ہم ملک  کی تقدیر بدلیں گے۔

مریم نواز  نے کہا کہ کیا کینسر اسپتال ایبٹ آباد کا حق نہیں؟ کیا اورینج ٹرین، میٹرو بس ایبٹ آباد کا حق نہیں؟ قوم جانتی ہےنوازشریف نے جو بھی وعدہ کیا وہ پورا کیا ہے۔ ملک کے چپے چپے پر نوازشریف کی خدمت کے نشان ہیں، دوسرےسوچتے ہیں کہاں جلسہ کریں کہ جہاں نوازشریف کے منصوبے نہ ہوں۔

پاکستان مسلم لیگ (ن) کی نائب صدر کا کہنا تھا کہ ایک جماعت کی خیبرپختونخوا میں10سال حکومت رہی اس نے اپنا منشور پیش نہیں کیا، کیا خیبرپختونخوا کو پسماندہ رہنا ہے یا پنجاب کی طرح ترقی کرنا ہے۔ عام انتخابات چند دن کی دوری پر ہیں، ایبٹ آباد والوں سوچ سمجھ کرووٹ دینا ہے، نوازشریف نے 22، 22 گھنٹے کی لوڈشیڈنگ ختم کی۔