مجھے صرف ایک موقع دیں ، کراچی کا پورا نقشہ تبدیل کردوں گا، بلاول بھٹو زرداری

پاکستان پیپلز پارٹی کے چیئرمین بلاول بھٹو زرداری کا کہنا ہے کہ انتخابی مہم کےلئے بلوچستان پنجاب اور خیبر پختونخوا گیا لیکن جو مزا کراچی میں آتا ہے وہ کہی اور نہیں وہ اس لئے کہ کراچی تو میرا اپنا شہر ہے۔ کراچی کی تمام سیٹیں پیپلز پارٹی کو دلوائیں تو یہاں کا نقشہ بدل دوں گا، کراچی کے عوام 8 فروری کو تیر پر مہر لگا کر تمام قوتوں کو جواب دیں۔

کراچی کے علاقے کیماڑی میں پیپلزپارٹی کی ریلی سے خطاب کرتے ہوئے سابق وزیر خارجہ بلاول بھٹو نے کہا کہ کراچی تو میرا اپنا شہر ہے، کراچی کی ترقی میں اپنا کردار ادا کرنا چاہتا ہوں، میں کراچی کی خدمت کرنا چاہتا ہوں، کراچی نے بلدیاتی انتخابات میں پیپلزپارٹی پر اعتماد کیا۔

بلاول بھٹو نے کہا کہ مزہ کراچی میں آتا ہے کیونکہ یہ میرا اپنا شہر ہے، کراچی نے اپنا جیالا میئر منتخب کیا، کراچی کی تمام سیٹیں پیپلز پارٹی کو دلوائیں تو یہاں کا نقشہ بدل دوں گا، آپ مجھے ووٹ دیں گے تو وفاق میں بھی حکومت حاصل کرسکوں گا۔

پیپلز پارٹی کے چیئرمین کا مزید کہنا تھا کہ ہر کوئی اپنا چورن بیچ رہا ہے، ہم اپنے کراچی کے مینڈیٹ کا تحفظ کریں گے، کراچی نے جو قربانیاں دی ہیں وہ تاریخ کا حصہ ہے، اب ہمیں کراچی کی ترقی کا بندوبست کرنا ہے۔

انہوں نے یہ بھی کہا کہ کراچی کے عوام 8 فروری کو تیر پر مہر لگا کر تمام قوتوں کو جواب دیں، قائد عوام نے کہا تھا کہ نا تیرا نا میرا یہ سب کا کراچی ہے۔