امریکہ کی ایران کو مزید حملوں کی وارننگ

واشنگٹن ڈی سی: امریکا نے مشرق وسطیٰ میں مزید حملوں کا عندیہ دے دیا ہے۔

وائٹ ہاؤس کے قومی سلامتی کے مشیر جیک سلیوان نے ایک پریس بریفنگ میں کہا کہ امریکہ مشرق وسطیٰ میں ایران کے حمایت یافتہ گروہوں کو نشانہ بنانے کے لیے مزید حملے کرنے کا ارادہ رکھتا ہے۔ انہوں نے کہا کہ ہم اس سلسلے میں مزید حملوں اور دیگر کارروائیوں کے بارے میں بھی سوچ رہے ہیں۔

جیک سلیوان نے مزید کہا کہ مشرق وسطی میں ایران کے حمایت یافتہ گروپوں پر مزید حملوں کا مقصد یہ واضح پیغام دینا ہے کہ جب ہماری افواج پر حملہ کیا جائے گا اور ہمارے لوگ مارے جائیں گے تو امریکہ جواب دے گا۔

دریں اثناء ایک سوال کے جواب میں امریکی قومی سلامتی کے مشیر نے ایران کے اندر حملے سے متعلق سوال کا جواب دینے سے گریز کرتے ہوئے کہا کہ امریکی فوج اس حوالے سے محتاط ہے۔

واضح رہے کہ امریکہ نے حالیہ دنوں میں عراق، شام اور یمن میں حملے کیے ہیں جن میں ایران کے حمایت یافتہ گروہوں کو نشانہ بنانے کا دعویٰ کیا گیا ہے۔ جبکہ امریکہ کے ساتھ مل کر برطانیہ نے بھی ہفتے کی رات یمن میں حوثیوں پر حملہ کیا۔