انتخابات میں صحافیوں کی سہولت کے لئے میڈیا ہیلپ لائن کا افتتاح

نگران وفاقی وزیر اطلاعات، نشریات و پارلیمانی امور مرتضیٰ سولنگی نے انتخابات 2024ءکی کوریج کرنے والے مقامی اور بین الاقوامی صحافیوں اور میڈیا پرسنز کی سہولت کے لئے میڈیا ہیلپ لائن کا افتتاح کر دیا۔

پریس انفارمیشن ڈیپارٹمنٹ میں منعقدہ میڈیا ہیلپ لائن کی افتتاحی تقریب سے خطاب کرتے ہوئے وفاقی وزیر اطلاعات نے کہا کہ 8 فروری کے انتخابات کا انعقاد پاکستان کے عوام کے ساتھ ہمارا وعدہ تھا،اب صرف دو دن باقی رہ گئے ہیں، ملک کے آئین کے دیباچے میں لکھا ہے کہ یہ ملک اس کے منتخب نمائندے چلائیں گے اور ہم اسی طرف گامزن ہیں۔ پاکستان کے 12 کروڑ سے زائد عوام 8 فروری 2024ءکو ووٹ کا حق استعمال کر کے اپنے نمائندے منتخب کریں گے۔

Mr. Murtaza Solangi, Minister for Information and broadcasting has Inaugurated the "Media Helpline-MoIB" app, an online platform crafted exclusively for local and international journalists and media personnel to facilitate coverage of the General Election of Pakistan 2024. pic.twitter.com/SHU057Givr

— Press Information Department (PID) (@pid_moib) February 5, 2024

انہوں نے کہا کہ 17 اگست 2023ءکے بعد سے نگران حکومت نے اپنی دیگر ذمہ داریوں اور امور کی انجام دہی کے علاوہ صاف، شفاف اور غیر جانبدارانہ انتخابات کے انعقاد کیلئے الیکشن کمیشن کی ہر طرح سے مدد کی۔ پاکستان کی ایک سیاسی جمہوری تاریخ ہے، پاکستان کے پہلے بالغ رائے دہی کے انتخابات 7 فروری 1970ءکو ہوئے اور انتخابات کا یہ عمل اسی کا تسلسل ہے۔

وفاقی وزیر اطلاعات نے کہا کہ موجودہ ڈیجیٹل میڈیا کے دور میں ہمیں اپنے کام کے طریقوں کو جدید اور اپ گریڈ کرنے کی ضرورت ہے۔ میڈیا ہیلپ لائن پلیٹ فارم انٹرنیٹ کی سہولت سے آراستہ کسی بھی موبائل، ٹیبلٹ، کمپیوٹر ڈیوائس کے برائوزر کے ذریعے قابل رسائی ہوگا۔