بلوچستان کے دو حلقوں میں آج دوبارہ پولنگ ہوگی

کوہلو: بلوچستان کے علاقے کوہلو میں قومی اسمبلی کے حلقہ این اے 253 اور پی بی 9 کے 7 پولنگ اسٹیشنز پر آج (جمعہ) کو دوبارہ پولنگ ہو رہی ہے۔

الیکشن کمیشن آف پاکستان (ای سی پی) کے مطابق آج ہونے والی پولنگ میں 8 ہزار 263 ووٹرز اپنا حق رائے دہی استعمال کریں گے جن کے لیے پانچ مشترکہ اور دو خواتین کے لیے صرف پولنگ اسٹیشنز قائم کیے گئے ہیں۔

الیکشن کمیشن نے کہا ہے کہ پولنگ کا عمل صبح 8 بجے سے شروع ہو کر شام 5 بجے تک بلا تعطل جاری رہے گا۔

واضح رہے کہ اس سے قبل 8 فروری کو تمام سات پولنگ اسٹیشنز پر مختلف وجوہات کی بنا پر پولنگ ملتوی کی گئی تھی جہاں آج دوبارہ پولنگ ہو رہی ہے۔