سعودی خواتین کی اونٹ سواری کے مقابلوں میں شرکت کے لیے تربیتی کیمپ قائم

ریاض: سعودی عرب میں اونٹ فیڈریشن نے جنادریہ کیمل فیلڈ میں 11 تا 30 مارچ کے دوران سعودی خواتین اونٹوں کی جوکیوں کے لیے تربیتی کیمپ قائم کر دیا ہے جس میں 12 اونٹ بان خواتین شرکت کریں گی۔

عرب خبر رساں ادارے کے مطابق کیمپ کے دوران اونٹوں کو سعودی اونٹ فیڈریشن کی نگرانی میں تربیت دی جاتی ہے تاکہ انہیں آئندہ چیمپئن شپ کے لیے تیار کیا جا سکے، جن میں سب سے اہم العلا اونٹ کپ ہے جو کہ اپریل میں ہو گا۔

فیڈریشن کے ایگزیکٹو ڈائریکٹر انجینئر محمود البلوی نے وضاحت کی کہ تربیتی کیمپ کا قیام سعودی اونٹ فیڈریشن کے بورڈ آف ڈائریکٹرز کے چیئرمین شہزادہ فہد بن جلوی کی ہدایت پر عمل میں لایا گیا ہے، تاکہ سعودی خواتین کو اونٹ سواری کے مقابلے کے لیے تیار کیا جا سکے۔