بجلی 5 روپے فی یونٹ مہنگی ہونے کا امکان

حکومت کی جانب سے ایک ماہ کیلئے بجلی  کی قیمت مزیدبڑھانے کا امکان ظاہر کیا جا رہا ہے ۔

سنٹرل پاور پرچیزنگ ایجنسی (سی پی پی اے)نے بجلی مہنگی کرنے کیلئے درخواست نیشنل پاور ریگولیٹری اتھارٹی (نیپرا )میں جمع کرادی  ہے، اضافہ فروری کی ماہانہ فیول ایڈجسٹمنٹ کی مد میں مانگا گیا ہے۔ سی پی پی اے  کی جانب سے  ایک ماہ کیلئے  بجلی 5 روپے فی یونٹ مہنگی کرنے کی درخواست کی گئی ہے ،

سی پی پی اے کی درخواست  میں کہا گیا ہے کہ فروری میں 6 ارب 87 کروڑ 60 لاکھ یونٹ بجلی فروخت ہوئی، فروری میں پانی سے 24.77فیصد بجلی پیدا کی گئی ،مقامی کوئلے سے 13.94 فیصد درآمدی کوئلے سے 1.89 فیصد بجلی پیدا کی گئی،  مقامی گیس سے 11.04 اور درآمدی ایل این جی سے 20.33 فیصد بجلی پیدا کی گئی ،فروری میں جوہری ایندھن سے 23.29 فیصد بجلی پیدا کی گئی۔

نیپرا سی پی پی اے کی درخواست پر 28 مارچ کو سماعت کرے گا،درخواست من و عن منظور ہونے پر صارفین پر 40ارب روپے سے زائد بوجھ پڑے گا۔