پاکستان روس سے مختلف شعبوں میں تعلقات استوار کر نا چاہتا ہے ، وزیر اعظم

وزیراعظم شہباز شریف نے کہا ہے کہ پاکستان روس کے ساتھ توانائی، تجارت اور سرمایہ کاری سمیت مختلف شعبوں میں دوطرفہ تعاون بڑھانے کا خواہشمند ہے۔

انہوں نے آج(ہفتہ) اسلام آباد میں روس کے سفیر البرٹ پی KHOREV سے ملاقات میں دونوں ملکوں کے درمیان تاریخی قریبی تعلقات کا حوالہ دیا۔

وزیراعظم نے بین الحکومتی کمیشن کے نویں اجلاس کے جلد انعقاد کی ضرورت پر زور دیا جو رواں سال کے آخر میں روس کی میزبانی میں ہو گا۔

شہباز شریف نے روس پر زور دیا کہ وہ دونوں ملکوں کے درمیان تجارت اور سرمایہ کاری کے موجودہ تعلقات کے فروغ کیلئے نئے مواقع تلاش کرنے کیلئے اپنا وفد پاکستان بھیجے ، وزیراعظم نے صدر پیوٹن کو جلد پاکستان کا دورہ کرنے کی بھی دعوت دی۔

واضح رہے کہ روسی سفیر نے وزیراعظم کو یقین دہانی کرائی کہ روس پاکستان کے ساتھ مضبوط تعلقات استوار کرنا چاہتا ہے۔