ٹی 20 ورلڈ کپ: قومی کرکٹ ٹیم کے اہم کھلاڑی عماد وسیم پہلے میچ سے باہر

قومی کرکٹ ٹیم کے اہم کھلاڑی عماد وسیم ٹی 20 ورلڈ کپ کے پہلے میچ سے باہر ہو گئے۔

آل راؤنڈر کی عدم دستیابی کی تصدیق کرتے ہوئے قومی ٹیم کے کپتان بابراعظم کا کہنا تھا کہ عماد وسیم سائیڈ اسٹرین کی تکلیف میں مبتلا ہیں، میڈیکل پینل کامشورہ ہے آل راؤنڈر کواحتیاطاً نہ کھلایا جائے تاکہ اگلے میچز کے لئے دستیاب ہوسکیں۔

بابراعظم کا کہنا تھا کہ عماد وسیم پہلا میچ نہیں کھیلیں گے مگر پرامید ہیں کہ وہ پاکستانی ٹیم کے بقیہ میچز میں دستیاب ہوں گے۔

قومی ٹیم کے کپتان باہر اعظم نے کہا کہ ہمارے کچھ کھلاڑی یہاں کھیل چکے ہیں جس کا فائدہ ہوگا، ان کا کہنا تھا کہ امید ہے یہاں کی کنڈیشنز شاداب کو مدد فراہم کریں گی۔کوشش کریں گے کہ ماضی کی غلطیوں کو نہ دہرائیں، بابر اعظم نے کہاکہ میرا ایک ہی ہدف ہے، ورلڈ کپ جیتنا۔

پندرہ کھلاڑیوں میں ابرار احمد، اعظم خان، محمد عباس آفریدی، صائم ایوب اور عثمان خان کوپہلی بار ٹی ٹوئنٹی ورلڈ کپ کےلیے منتخب کیا گیا ہےجبکہ محمد عامر اور عماد وسیم نے آخری بار 2016 اور 2021 میں ٹی ٹوئنٹی ورلڈ کپ کھیلا تھا، دیگر آٹھ کھلاڑیوں نے 2022 میں آسٹریلیا میں منعقدہ ٹی ٹوئنٹی ورلڈ کپ میں حصہ لیا تھا۔

یاد رہے کہ پاکستان اپنا پہلا میچ امریکا کے خلاف 6 جون کوکھیلے گا، امریکہ کی ٹیم اپنے پہلے میچ میں کینیڈا کو شکست دے چکی ہے۔