حمزہ شہباز کو بھی ایف آئی اے نے طلب کر لیا

تفصیلات کے مطابق شہباز شریف کے بعد حمزہ شہباز کو بھی فیڈرل انویسٹی گیشن ایجنسی (ایف آئی اے )نے طلب کر لیا ہے۔

ایف آئی اے کا کہنا ہے کہ  حمزہ شہباز کو 24 جون کو طلب کیا ہے،حمزہ شہباز کو چینی اسکینڈل اور منی لانڈرنگ میں طلب کیا گیا ہے، جبکہ شہباز شریف 22 جون کو ایف آئی اے کے دفتر پیش ہو نگے۔

گزشتہ روز  ایف آئی اے نے صدر مسلم لیگ ن شہباز شریف کو 22 جون کو شوگر اسکینڈل میں طلب کیا تھا، صدر مسلم لیگ ن اور قائد حزب اختلاف  شہباز شریف  کو ایف آئی اے  نے تمام دستاویزات ساتھ لانے کی ہدایت  کی تھی۔ایف آئی اے حکام کے مطابق ایف آئی اے کو شہبازشریف کے شوگر اسکینڈل میں ملوث ہونے کے شواہد ملے تھے ۔ ایف آئی اے کے مطابق    ذاتی حیثیت میں پیش نہ ہونے پر گرفتار یا قانونی کاروائی کی جا سکتی ہے۔

واضح رہے کہ ایف آئی اے لاہور گزشتہ سال سے اربوں روپے کے شوگر اسکینڈل کی تحقیقات کررہی ہے۔ایف  آئی اے لاہور نے گزشتہ نومبر میں شوگر اسکینڈل میں جہانگیر ترین، ان کے بیٹے علی ترین، مسلم لیگ (ن) کے صدر شہباز شریف، ان کے بیٹے حمزہ اور سلیمان شہباز اور دیگر کے خلاف منی لانڈرنگ، فراڈ اور دیگر الزامات کے تحت مقدمات درج کیے تھے۔