تمام افراد کو حج کے لیے الگ درخواست جمع کروانا ہونگی ، سعودی وزارت حج

سعودی وزارت حج و عمرہ  کے مطابق خاندان کے افراد اگر حج کرنا چاہتے ہیں تو ہر ایک فرد کو الگ الگ درخواست دینا ہوگی ۔

درخواست منظور ہونے کے بعد دوسرے مرحلے میں جب پیکج خریدا جائیگا تب درخواست گزار اپنے ساتھ فیملی کے دیگر افراد کو شامل کرسکتا ہے ۔

فیملی سربراہ اپنی درخواست جمع کراتے وقت مرافقین میں سے بیوی یا 18سال سے زائد عمر کے بچوں کو شامل نہیں کرسکتا ۔

اسی طرح کوئی شخص اپنے معمر والدین کو حج کرانا چاہتا ہے تو مرافقین  کے طور پر انہیں بھی شامل نہیں کیا جاسکتا۔

وزارتِ حج و عمرہ  نے واضح کیا ہے کہ ہر شخص کو خواہ مرد ہو یا عورت یا اٹھارہ سال سے زیادہ عمر کے بچے ہوں یا معمر افراد ہوں ، ہر ایک کو الگ الگ درخواست جمع کروانا ہوگی ۔

تاہم پیکج خریدتے وقت اپنے ساتھ مرافقین کو بھی شامل کیا جاسکتا ہے ، لیکن اس میں واضح ہو کہ ہر ایک کی الگ فیس دینا ہوگی ۔

وزارت حج و عمرہ نے ایک شہری کے سوال کے جواب میں استفسار کیا تھا کہ جس نے سوال کیا تھا کہ کیا وہ اپنی اہلیہ کو اپنے ساتھ مرافقین  میں شامل کرسکتا ہے ۔

واضح رہے کہ سعودی وزارت حج و عمرہ نے حج کی آن لائن درخواستیں وصول کرنا شروع کردی ہیں  یہ پہلا مرحلہ ہے جو تیرہ ذی القعدہ تک جاری رہے گا۔