تحریک انصاف نے ثابت کر دیا کہ ان کی اولین ترجیح ملکی سلامتی نہیں بلکہ بانی ہے،وزیر دفاع

اسلام آباد: وزیر دفاع خواجہ محمد آصف نے کہا ہے کہ پاکستان تحریک انصاف نے قومی سلامتی کمیٹی کے اجلاس میں شرکت نہ کر کے ثابت کر دیا ہے کہ ان کی اولین ترجیح قومی سلامتی نہیں بلکہ بانی پی ٹی آئی ہے۔
پاکستان مسلم لیگ ن سینئر رہنمااور وزیر دفاع خواجہ آصف نے سماجی رابطوں کی ویب سائٹ ’ایکس‘ پر اپنی پوسٹ میں قومی سلامتی کمیٹی میں شرکت نہ کرنے پر تحریک انصاف کو شدید تنقید کا نشانہ بنایا۔
خواجہ آصف کا کہنا تھا کہ پی ٹی آئی نے آج ثابت کردیا کہ ان کی اولین ترجیح عمران خان ہے،، وطن کی سلامتی اور امن ان کے لیے کوئی اہمیت نہیں رکھتا۔
انہوں نے ایکس پر اپنے پیغام میںالزام عائد کیا کہ پی ٹی آئی کا نصب العین ’خان نہیں تو پاکستان نہیں‘ ہے، وطن دہشت گردی کی آگ میں جل رہا ہے اور پی ٹی آئی اپنے مفادات کی سیاست کررہی ہے۔انہوں نے سوال کیا کہ اس جنگ میں پی ٹی آئی کس کے ساتھ کھڑی ہے، اس سے بڑھ کر وطن دشمنی اور کیا ہوسکتی ہے؟
خواجہ آصف نے عزم ظاہر کیا کہ دہشت گردی کیخلاف اتحاد اور فیصلہ کن اقدام ترتیب دیے جارہے ہیں، سویلین اور فوجی قیادت دشمن کے خلاف قوم کو ایک پیج لانے کی بات ہورہی ہے اور اس جنگ میں پاکستان کی فتح ہوگی۔
واضح رہے کہ پی ٹی آئی نے قومی سلامتی کمیٹی کے اجلاس میں شرکت بانی پی ٹی آئی سے ملاقات کرانے سے مشروط کی تھی۔