پاکستان اور آذربائیجان کے درمیان کثیرالجہتی تعاون پر اتفاق

پاکستان اور آذربائیجان کے درمیان کثیرالجہتی تعاون پر اتفاق ہوا ہے۔

ترجمان دفتر خارجہ کے مطابق ڈپٹی وزیراعظم و وزیر خارجہ اسحاق ڈار کی آذربائیجان کے وزیر معیشت مکایل جباروف کی سربراہی میں آذربائیجانی وفد سے ملاقات ہوئی جس میں دوطرفہ اقتصادی تعاون بڑھانے پر گفتگو کی گئی۔

ملاقات کے دوران سرمایہ کاری کے اہم منصوبوں اور مختلف ایم او یوز پر غور بھی کیا گیا ، دوران ملاقات آذربائیجان کے صدر کے متوقع دورہ پاکستان سے قبل اقدامات تیز کرنے پر بھی اتفاق کیا گیا۔

ملاقات میں وزیر خارجہ اسحاق ڈار نے پاکستان، آذربائیجان تعلقات مزید مضبوط بنانے کے عزم کا اعادہ کیا ، اس کے علاوہ دونوں ممالک نے دو طرفہ اقتصادی تعاون پر اطمینان کا اظہار کیا اور معاشی روابط مزید مضبوط بنانے پر بھی زور دیا۔ 

ملاقات کے اختتام پر آذربائیجان کے وزیر معیشت مکایل جباروف نے پاکستان میں پرتپاک میزبانی پر شکریہ ادا کیا۔