پاکستان ریلویز نے گزشتہ گیارہ ماہ میں ریکارڈ 83 ارب روپے کمالیے 

لاہور: پاکستان ریلویز نے مالی سال کے ابتدائی گیارہ ماہ میں 83 ارب روپے کی آمدن حاصل کرکے ایک تاریخی سنگِ میل عبور کر لیا ہے۔ 

ترجمان ریلوے کے مطابق یہ کارکردگی اس مدت کے دوران ادارے کی تاریخ میں سب سے زیادہ آمدن کی عکاسی کرتی ہے اور آپریشنز و مالی نظم و نسق میں نمایاں بہتری کو ظاہر کرتی ہے۔

 ترجمان ریلوے نے کہا رواں مالی سال مسافر ٹرینوں کے شعبے سے 42 ارب روپے حاصل ہوئے جبکہ مال گاڑیوں سے 29 ارب روپے جبکہ دیگر ذرائع سے مزید 12 ارب روپے کی آمدن ہوئی۔ 

مالی سال کا ایک ماہ باقی ہونے کے باوجود پاکستان ریلویز 88 ارب روپے کی سالانہ سابقہ بلند ترین حد عبور کرنے کے قریب پہنچ چکا ہے۔
 ترجمان ریلوے کے مطابق ریلوے کے مختلف ڈویژنز میں کراچی ڈویژن آمدنی کے اعتبار سے سرفہرست رہا، جس نے مسافر ٹرینوں سے 13 ارب روپے اور مال گاڑیوں سے 25 ارب روپے کمائے۔

 اسی طرح لاہور ڈویژن نے مسافر ٹرینوں سے 10 ارب اور فریٹ آپریشنز سے 75 کروڑ روپے حاصل کیے،جبکہ راولپنڈی، ملتان ڈویژن نے پسنجر سیکٹر سے مجموعی طور پر آٹھ ارب آمدن حاصل کی۔

وفاقی وزیر ریلوے حنیف عباسی نے کہا کہ مالی سال کے 11 ماہ میں اس قدر آمدن تاریخ میں کبھی حاصل نہیں ہوئی، پچھلے سال اسی عرصے میں ریلوے نے 77 ارب ریونیو اکٹھا کیا تھا۔

حنیف عباسی نے کہا کہ محنت اور لگن سے ریلوے کو اپنے پاؤں پر کھڑا کریں گے۔