پاکستانی وفد تجارت پر مذاکرات کیلئے آئندہ ہفتے امریکا آ رہا ہے، صدر ٹرمپ

واشنگٹن: امریکی صدر ڈونلڈ ٹرمپ نے کہاہے کہ تجارت پر مذاکرات کرنے کے لیے پاکستانی وفد آئندہ ہفتے امریکا آ رہا ہے۔

غیر ملکی میڈیا کے مطابق جوائنٹ بیس اینڈریوز پر میڈیا کے نمائندوں سے بات کرتے ہوئے صدر ٹرمپ نےکہا کہ وہ بھارت اور پاکستان دونوں کے ساتھ کام کررہے ہیں، امریکا اس وقت بھارت سے ڈیل کرنے کے بہت قریب ہے جبکہ پاکستانی نمائندے آئندہ ہفتے امریکا آرہے ہیں۔

 صدر ٹرمپ نے کہا کہ اگر پاکستان اور بھارت کے درمیان جنگ چھڑی تو مجھے دونوں ممالک کے ساتھ کسی قسم کے تجارتی معاہدے میں کوئی دلچسپی نہیں ہوگی۔

صدر ٹرمپ نے کہا کہ انہیں فخر ہے کہ وہ بھارت اور پاکستان کے ساتھ ڈیل کررہے ہیں اور اس بات پر بھی کہ امریکا نے بھارت اور پاکستان کے درمیان ممکنہ ایٹمی جنگ گولیوں کے بجائے تجارت کے ذریعے روک لی ہے۔

صدرٹرمپ نے کہا کہ عام طور پر یہ ملک گولیوں کا تبادلہ کرتے ہیں تاہم ہم تجارت کرتے ہیں اور اس لیے انہیں یہ جنگ تجارت کے ذریعے روکنے پر بہت فخر ہے۔
خیال رہے کہ پاکستان کو امریکا کے ساتھ 3 ارب ڈالر کے تجارتی اضافے کی وجہ سے اپنی برآمدات پر 29 فیصد تک کے ممکنہ ٹیرِف (محصولات) کا سامنا ہے، یہ ٹیرِف واشنگٹن کی جانب سے گزشتہ ماہ دنیا بھر کے ممالک پر نافذ کیے گئے تھے۔

دوسری جانب وفاقی وزیر خزانہ محمد اورنگزیب نے صدرٹرمپ کے بیان سے ایک روز پہلے کہا تھا کہ انکا امریکا کے تجارتی نمائندے سفیر جیمیسن گریئر سے رابطہ ہواہے، اسطرح پاکستان اور امریکا کے درمیان باہمی ٹیرف پر باضابطہ مذاکرات کا آغاز ہو گیا ہے۔

اس سے قبل بھارتی وزیر تجارت پیوش گوئل نے واشنگٹن کا دورہ کیا تھا جس میں انہوں نے بھارت اور امریکا کے درمیان تجارتی امور پربات کی تھی، امکان ہے کہ دونوں ملکوں کے درمیان تجارتی معاہدہ پر جولائی کے اوائل میں دستخط ہوجائیں گے۔