مالی سال 2025 : ترسیلات زر میں ریکارڈ اضافہ،38.3 ارب ڈالر پاکستان منتقل ہوئے، اسٹیٹ بینک

اسٹیٹ بینک آف پاکستان نے مالی سال 2025 کے اختتام پر ترسیلات زر کی تفصیلات جاری کر دی ہیں، جس کے مطابق جون 2025 کے دوران بیرونِ ملک مقیم پاکستانیوں نے 3 ارب 40 کروڑ ڈالر وطن منتقل کیے۔ ترسیلات زر میں سالانہ بنیاد پر 7.9 فیصد اضافہ ریکارڈ کیا گیا ہے۔

مرکزی بینک کے مطابق مالی سال 2025 کے دوران مجموعی ترسیلات زر کا حجم 38 ارب 30 کروڑ ڈالر رہا، جو گزشتہ مالی سال 2024 کے 30 ارب 30 کروڑ ڈالر کے مقابلے میں 8 ارب ڈالر سے زائد کا نمایاں اضافہ ہے۔

ترسیلات زر کی ملک وار تفصیل کے مطابق سعودی عرب 82 کروڑ 30 لاکھ ڈالر کے ساتھ پہلے نمبر پر رہا، جہاں مقیم پاکستانیوں کی بڑی تعداد وطن رقم بھیجنے میں پیش پیش رہی۔

ماہرین کے مطابق ترسیلات زر میں یہ اضافہ اوورسیز پاکستانیوں کے اعتماد، قانونی ذرائع سے رقوم بھیجنے کی حوصلہ افزائی، اور حکومتی اقدامات کا نتیجہ ہے۔ اس نمایاں اضافے سے ملک کے زرمبادلہ کے ذخائر اور معیشت کو سہارا ملنے کی امید کی جا رہی ہے۔