بھارتی ٹیم کو ایشیا کپ  میں شرکت اور پاکستان سے میچ کھیلنے کی اجازت مل گئی

ممبئی: بھارتی حکومت نے اپنی کرکٹ ٹیم کو ایشیا کپ 2025 میں شرکت کرنے اور پاکستان کے ساتھ میچز کھیلنے کی اجازت دے دی۔

تفصیلات کے مطابق بھارتی وزارت کھیل نے ایشیا کپ میں شرکت کرنے اور پاکستان کے ساتھ میچز کھیلنے کے لیے اپنی کرکٹ ٹیم کو اجازت دے دی ہے۔

بھارتی وزارت کھیل  کی جانب سے واضح کیا گیا جہاں تک ایک دوسرے کے ممالک میں دو طرفہ کھیلوں کے مقابلوں کا تعلق ہے تو بھارتی ٹیمیں پاکستان میں ہونے والے مقابلوں میں شرکت نہیں کریں گی۔ نہ ہی ہم پاکستانی ٹیموں کو بھارت میں کھیلنے دیں گے۔

خیال رہے کہ ایشیا کپ میں پاکستان اور بھارت 14 ستمبر کودبئی میں مدمقابل ہوں گے، ایشیا کپ کے لیے بھارت پہلے ہی 15 رکنی اسکواڈ کا اعلان کر چکا ہے۔

بھارتی میڈیا کے مطابق سوریا کمار یادیو کو بھارتی ٹیم کا کپتان برقرار رکھا گیا ہے جبکہ شبھمن گل نائب کپتان ہوں گے۔

اسکواڈ میں ہاردک پانڈیا، اکشر پٹیل، شیوام دوبے، رنکو سنگھ، وکٹ کیپرز کے طور پر جیتیش شرما اور سنجو سیمسن کو اسکواڈ میں شامل کیا گیا ہے۔

باؤلنگ میں جسپریت بمرا، ارشدیپ سنگھ، ہرشت رانا اور کلدیپ یادیو کو منتخب کیا گیا ہے، ورون چکرورتی، تلک ورما، ابھیشیک شرما بھی اسکواڈ کا حصہ ہیں۔