جے شنکر کی ٹرمپ پر تنقید، پاک-بھارت کشیدگی امریکا ثالثی کی کوششیں مسترد

بھارتی وزیر خارجہ ایس جے شنکر نے پاکستان کے ساتھ تعلقات پر اپنی پوزیشن کو مزید مستحکم کرتے ہوئے کہا ہے کہ بھارت کسی بھی تیسرے فریق کی ثالثی کو قبول نہیں کرے گا۔

نئی دہلی میں اکنامک ٹائمز ورلڈ لیڈرز فورم کے دوران خطاب کرتے ہوئے جے شنکر نے سابق امریکی صدر ڈونلڈ ٹرمپ پر تنقید کی اور کہا کہ "ہم نے کبھی ایسا امریکی صدر نہیں دیکھا جس نے خارجہ پالیسی کو اتنے عوامی طریقے سے چلایا ہو۔"

جے شنکر نے تسلیم کیا کہ "آپریشن سندور" کے دوران بھارت کو امریکا اور دیگر ممالک کی طرف سے فون کالز موصول ہوئیں۔ ان کا کہنا تھا کہ یہ کوئی خفیہ بات نہیں ہے، اور سب کچھ ان کے ایکس (سابقہ ٹوئٹر) اکاؤنٹ پر موجود ہے۔

یاد رہے کہ بھارت نے پہلگام کے واقعے کو جواز بنا کر پاکستان کے خلاف جارحیت کا مظاہرہ کیا تھا، جس پر پاکستان نے بھرپور جواب دیتے ہوئے نہ صرف بھارت کے چھ جنگی طیارے مار گرائے بلکہ ایس-400 دفاعی نظام اور متعدد ایئر بیسز کو بھی نقصان پہنچایا۔

امریکی صدر ڈونلڈ ٹرمپ متعدد مواقع پر یہ دعویٰ کر چکے ہیں کہ انہوں نے پاک-بھارت کشیدگی کو کم کرنے میں ثالثی کا کردار ادا کیا، لیکن بھارتی حکومت نے اس معاملے پر مسلسل خاموشی اختیار کر رکھی ہے، جس کی وجہ سے اپوزیشن نے مودی سرکار کو شدید تنقید کا نشانہ بنایا ہے۔