9 مئی کے اشتہاری قانون کے کٹہرے میں لائے جائیں گے: عظمیٰ بخاری

پنجاب کی وزیراطلاعات عظمیٰ بخاری نے کہا ہے کہ کور کمانڈر کے یونیفارم کی توہین کرنے والے افراد کو مظلومیت اور "چادر و چار دیواری" کا کارڈ کھیلنے کا کوئی حق نہیں۔

اپنے ایک بیان میں عظمیٰ بخاری نے کہا کہ 9 مئی کے واقعات میں ملوث افراد کے جرائم کو مریم نواز کے سر ڈالنے کی روایت بند ہونی چاہیے۔ انہوں نے سوال کیا کہ کیا مریم نواز نے خیبرپختونخوا کی حکومت کی طرح 9 مئی کے دہشتگردوں کو پناہ دی تھی؟

ان کا کہنا تھا کہ یہ مریم نواز کی قیادت میں قائم حکومت ہے، جہاں تمام ادارے آزاد اور خودمختار ہیں — یہ بانی تحریک انصاف کی حکومت نہیں کہ جسے چاہا اٹھا لیا اور جسے چاہا چھوڑ دیا۔

عظمیٰ بخاری نے واضح کیا کہ 9 مئی کے مقدمات میں نامزد اور مطلوب افراد کو قانون کے مطابق جیل میں ہونا چاہیے۔ "اشتہاریوں اور مفروروں کو گرفتار کرنا کسی کی ذاتی خواہش نہیں بلکہ قانون کی ذمہ داری ہے،" انہوں نے کہا۔

انہوں نے مزید کہا کہ کور کمانڈر ہاؤس پر حملے کے دوران "چادر و چار دیواری" کا تقدس بھی پامال ہوا تھا۔ "کیا تحریک انصاف کے افراد کے گھروں کی حرمت ہی صرف قابلِ احترام ہے؟ باقی کسی کا گھر نہیں؟" انہوں نے سوال اٹھایا۔