سابق سری لنکن صد ر کو جیل بھیجے جانے کے اگلے ہی روز ہسپتال منتقل کر دیا گیا

سری لنکا کے سابق صدر رانیل وکرما سنگھے کو حکومتی فنڈز کے مبینہ غلط استعمال کے الزام میں حراست میں لیے جانے کے صرف ایک دن بعد کولمبو کے نیشنل اسپتال کے انتہائی نگہداشت وارڈ (ICU) میں منتقل کر دیا گیا۔

عالمی خبررساں ادارے اے ایف پی کے مطابق، اسپتال کے ڈپٹی ڈائریکٹر جنرل رکشن بیلانا نے بتایا کہ وکرما سنگھے شدید ڈی ہائیڈریشن (پانی کی کمی) کا شکار تھے اور ان کی صحت کو سنجیدہ پیچیدگیوں سے بچانے کے لیے فوری طبی نگرانی اور علاج کی ضرورت تھی۔

ان کے مطابق سابق صدر پہلے ہی ذیابیطس اور ہائی بلڈ پریشر جیسے عوارض میں مبتلا تھے، اور جیل لائے جانے کے بعد ان کی طبیعت مزید بگڑ گئی۔

جیل کے حکام کے مطابق، جیل کا طبی مرکز انہیں مناسب علاج فراہم کرنے کی صلاحیت نہیں رکھتا تھا، جس کی وجہ سے انہیں فوری طور پر کولمبو کے مرکزی سرکاری اسپتال منتقل کیا گیا۔

حکام نے یہ بھی بتایا کہ وکرما سنگھے کی حالت اب 'مستحکم' ہے اور ان کی مسلسل نگرانی کی جا رہی ہے۔

دوسری جانب، اپوزیشن اراکین پارلیمنٹ نے جیل میں ان سے ملاقات کی اور دعویٰ کیا کہ وہ بظاہر ٹھیک حالت میں تھے۔

اپوزیشن جماعتوں نے حکومت پر سخت تنقید کرتے ہوئے الزام عائد کیا ہے کہ سابق صدر کو سیاسی انتقام کا نشانہ بنایا جا رہا ہے، اور انہیں صرف اس خدشے کے تحت جیل بھیجا گیا ہے کہ وہ دوبارہ اقتدار میں نہ آ جائیں۔