ایوی ایشن جرنلسٹس کے اعزاز میں ظہرانہ ، پیپلز یونٹی کا پی آئی اے کے دفاع کا عزم

پیپلز یونٹی آف پی آئی اے کی جانب سے پاکستان ایوی ایشن جرنلسٹس ایسوسی ایشن (PAJA) کے عہدیداروں کے اعزاز میں ایک پرتکلف ظہرانے کا اہتمام مقامی ہوٹل "رائل سوئس" لاہور میں کیا گیا۔

تقریب میں پیپلز یونٹی کے قائدین نے ایسوسی ایشن کے قیام پر دلی مبارکباد پیش کی اور ایوی ایشن شعبے میں صحافی برادری کے مثبت، تحقیقی اور تعمیری کردار کو سراہا۔

ظہرانے میں پیپلز یونٹی آف پی آئی اے لاہور کے سیکریٹری جنرل کاشف رانا، سینئر نائب صدر رائے علی عثمان، آرگنائزنگ سیکریٹری ریاض احمد، ویلفیئر سیکریٹری نواز اعوان سمیت متعدد کارکنان نے شرکت کی۔

جبکہ پاکستان ایوی ایشن جرنلسٹس ایسوسی ایشن کے تاحیات پیٹرن انچیف عدنان ملک، صدر طالب فریدی، سیکریٹری جنرل واصف محمود، سینئر نائب صدر امریز خان، جوائنٹ سیکریٹری حسن حفیظ، سیکریٹری فنانس عمیر رانا، اور سینئر ایوی ایشن صحافیوں رانا محمد علی، نصیر واہگہ، شاہد چوہدری، افضل افتخار، میاں نوید اور جعفر بن یار بھی تقریب کا حصہ بنے۔

سابق ترجمان سول ایوی ایشن اتھارٹی کامران ملک نے بطور مہمانِ خصوصی شرکت کی۔

اس موقع پر خطاب کرتے ہوئے کاشف رانا نے کہا کہ قومی ایئرلائن کی بحالی میں ایوی ایشن جرنلسٹس کا مؤثر کردار قابل تحسین ہے۔ انہوں نے واضح کیا کہ پی آئی اے کی مجوزہ نجکاری کے خلاف پیپلز یونٹی ایک آہنی دیوار کی مانند کھڑی ہے اور ادارے کو کسی بھی قیمت پر فروخت نہیں ہونے دیا جائے گا۔

کاشف رانا نے مزید کہا کہ اگر حکومت پی آئی اے کو 15 نئے مسافر طیارے اور کارگو فریٹرز فراہم کرے تو ادارہ سالانہ اربوں ڈالرز کا ریونیو پیدا کر سکتا ہے، جو نہ صرف اس کے خسارے ختم کرے گا بلکہ ملکی معیشت میں بھی مضبوط کردار ادا کرے گا۔