بھارتی بیٹر چتیشور پجارا کا تمام طرز کی کرکٹ سے ریٹائرمنٹ کا اعلان

بھارتی کرکٹ ٹیم کے تجربہ کار بلے باز چتیشور پجارا نے بین الاقوامی اور ڈومیسٹک سمیت تمام طرز کی کرکٹ سے ریٹائرمنٹ کا اعلان کر دیا ہے۔

سوشل میڈیا پر جاری اپنے بیان میں 37 سالہ پجارا نے کہا کہ "تمام اچھی چیزوں کا ایک اختتام ہوتا ہے، میں نے تمام طرز کی کرکٹ سے ریٹائرمنٹ لینے کا فیصلہ کر لیا ہے۔"
انہوں نے مزید کہا کہ "بھارتی جرسی پہننا، قومی ترانہ گانا، اور ہر بار میدان میں اپنی بہترین کارکردگی پیش کرنا میرے لیے ناقابلِ بیان لمحات تھے۔"

چتیشور پجارا نے 2010 میں آسٹریلیا کے خلاف ٹیسٹ ڈیبیو کیا تھا، جب کہ آخری بار وہ جون 2023 میں ورلڈ ٹیسٹ چیمپئن شپ فائنل میں آسٹریلیا کے خلاف بھارتی ٹیم کا حصہ بنے۔

اپنے 13 سالہ ٹیسٹ کیریئر میں پجارا نے بھارت کی جانب سے 103 ٹیسٹ اور 5 ون ڈے میچز کھیلے، جن میں انہوں نے ٹیسٹ فارمیٹ میں 7195 رنز اسکور کیے۔

ان کی سب سے یادگار کارکردگی 2018-19 کی آسٹریلیا ٹیسٹ سیریز میں رہی، جہاں انہوں نے تین شاندار سنچریاں بناکر بھارت کو آسٹریلیا میں پہلی بار ٹیسٹ سیریز جتوانے میں کلیدی کردار ادا کیا۔