مہاراشٹرا میں صدر ٹرمپ کے خلاف ٹیرف پر احتجاج، دیوہیکل پتلا اٹھا کر نعرے بازی

بھارتی ریاست مہاراشٹرا کے شہر ناگپور میں مذہبی تہوار کے دوران امریکی صدر ڈونلڈ ٹرمپ کے بھارت پر اضافی ٹیرف کے خلاف انوکھا احتجاج کیا گیا۔

بھارتی میڈیا کے مطابق شہریوں نے جشن کے دوران صدر ٹرمپ کا دیوہیکل پتلا اٹھا رکھا تھا، جس پر مختلف احتجاجی پلے کارڈز آویزاں کیے گئے تھے۔ ان پلے کارڈز پر درج نعروں میں کہا گیا تھا:

• "جو ٹیرف سے ڈرا رہا ہے، بھارتی طاقت اُسے رُلا دے گی"

• "بھارت کو اپنا دوست کہنے والے محبت پاکستان سے کرتے ہیں"

اطلاعات کے مطابق ٹرمپ کا یہ پتلا مٹی اور بھوسے سے تیار کیا گیا تھا، جسے سرخ رنگ کے سوٹ، سفید قمیض اور پیلی ٹائی کے ساتھ سجایا گیا۔ مزید برآں، گیندے کے پھولوں کے ہار اور احتجاجی پوسٹروں سے اسے نمایاں کیا گیا تھا۔

یہ احتجاج "مربت میلہ" کے دوران کیا گیا، جو 1800 کی دہائی کے آخر سے ناگپور میں منایا جاتا ہے۔ اس تہوار میں دیوہیکل پتلوں کے ذریعے برائی، ظلم اور سماجی ناہمواریوں کے خلاف علامتی مزاحمت کی جاتی ہے، اور عوام اپنے سیاسی و معاشی مسائل کو اجاگر کرتے ہیں۔

واضح رہے کہ حالیہ دنوں امریکی صدر ٹرمپ نے روس سے تیل کی خریداری پر بھارت پر اضافی ٹیرف عائد کیے ہیں۔ اس فیصلے کے تحت بھارت پر پہلے ہی 25 فیصد ٹیرف نافذ ہو چکا ہے، جب کہ مزید 25 فیصد ٹیرف 27 اگست سے نافذ العمل ہوگا۔