بھارتی الرٹ کے بعد سیالکوٹ میں ممکنہ سیلاب کا خطرہ، ایمرجنسی اقدامات تیز

بھارت کی جانب سے جاری کردہ الرٹ کے بعد سیالکوٹ میں ممکنہ سیلابی صورتحال کے خدشات پیدا ہوگئے ہیں۔

 سیکریٹری ایمرجنسی سروسز پنجاب، ڈاکٹر رضوان نصیر نے سیالکوٹ کا ہنگامی دورہ کیا جہاں انہوں نے ممکنہ خطرات اور انتظامات کا جائزہ لیا۔

انہیں فلڈ کنٹرول روم میں پانی کی موجودہ صورتحال اور مرالہ بیراج کی رپورٹس پیش کی گئیں۔ حکام نے بتایا کہ ممکنہ سیلاب کے پیش نظر تمام متعلقہ سیکٹرز کو الرٹ کر دیا گیا ہے۔ 9 اہم مقامات پر 18 ریسکیو کشتیوں، 60 ریسکیورز اور 30 اسکاوٹس کو تعینات کر دیا گیا ہے۔

ڈاکٹر رضوان نصیر نے مرالہ بیراج پر پانی کے اخراج اور ریسکیو اقدامات پر اطمینان کا اظہار کیا اور ہدایت دی کہ عوام کو ہر ممکن ریلیف فراہم کیا جائے، جبکہ قریبی آبادیوں کو بروقت خبردار کرنے کا مؤثر نظام یقینی بنایا جائے۔

ترجمان پی ڈی ایم اے کے مطابق، دریائے چناب میں آنے والا ممکنہ سیلابی ریلا سیالکوٹ اور گجرات کے علاقوں کو متاثر کرسکتا ہے، جبکہ دریائے چناب اور اس سے منسلک ندی نالوں میں بھی طغیانی کا خطرہ ہے۔

دوسری جانب، بھارتی آبی جارحیت کے باعث دریائے ستلج میں پانی کی سطح ایک بار پھر بلند ہونا شروع ہوگئی ہے۔ بہاولنگر کے متعدد علاقوں میں پانی داخل ہو چکا ہے، جس کے نتیجے میں سینکڑوں ایکڑ زرعی زمین زیرِ آب آ گئی ہے، فصلیں تباہ ہو گئی ہیں اور زمینی کٹاؤ سے آبادیوں کو بھی خطرہ لاحق ہے۔