دو ماہ میں تجارتی خسارہ 6 ارب ڈالر سے تجاوز کر گیا، درآمدات میں اضافہ

اسلام آباد: وفاقی ادارہ شماریات کی جانب سے جاری کردہ تازہ اعداد و شمار کے مطابق رواں مالی سال کے ابتدائی دو ماہ (جولائی اور اگست 2025) میں پاکستان کا تجارتی خسارہ 29.01 فیصد اضافے کے ساتھ 6 ارب ڈالر سے تجاوز کر گیا ہے۔

رپورٹ کے مطابق اگست 2025 میں سالانہ بنیاد پر تجارتی خسارے میں 30.13 فیصد اضافہ ہوا، جس کے بعد خسارہ 2 ارب 86 کروڑ 80 لاکھ ڈالرز تک پہنچ گیا۔ تاہم ماہانہ بنیاد پر خسارے میں 8.81 فیصد کمی ریکارڈ کی گئی۔

درآمدات میں نمایاں اضافہ

ادارہ شماریات کے مطابق، جولائی اور اگست کے دوران ملکی درآمدات میں 14.23 فیصد کا نمایاں اضافہ ہوا، اور مجموعی درآمدات 11 ارب 11 کروڑ 50 لاکھ ڈالرز تک پہنچ گئیں۔ صرف اگست میں درآمدات کا حجم 5 ارب 28 کروڑ 50 لاکھ ڈالرز رہا۔

برآمدات میں معمولی بہتری، اگست میں گراوٹ

دوسری جانب برآمدات میں معمولی بہتری دیکھی گئی، اور دو ماہ میں برآمدات 0.65 فیصد اضافے کے ساتھ 5 ارب 10 کروڑ 20 لاکھ ڈالرز پر پہنچیں۔ تاہم اگست 2025 میں برآمدات میں سالانہ بنیاد پر 12.49 فیصد اور ماہانہ بنیاد پر 9.98 فیصد کمی دیکھنے میں آئی، جس سے برآمدات کا حجم 2 ارب 41 کروڑ 70 لاکھ ڈالرز تک محدود رہا۔

معاشی ماہرین کے مطابق، درآمدات میں تیزی سے اضافہ اور برآمدات میں کمی ملکی تجارتی توازن کے لیے تشویشناک ہے اور اس سے زرِ مبادلہ کے ذخائر اور کرنٹ اکاؤنٹ پر بھی دباؤ بڑھے گا۔