پشاور: پولیس وردی میں ڈکیتیاں کرنیوالے 4 ڈاکو مارے گئے، 3 افغان شہری نکلے

پشاور: صوبائی دارالحکومت پشاور کے علاقے میراکچھوڑی مہرگل کلے میں پولیس مقابلے کے دوران 4 ڈاکو مارے گئے۔

 تفصیلات کے مطابق  ڈاکوؤں کی موجودگی کی اطلاع پر پولیس پہنچی تو ملزمان نے فائرنگ کر دی، جوابی فائرنگ سے گینگ کے چاروں ڈاکو مارے گئے۔

اس حوالے سے پولیس حکام کا کہنا ہے کہ مارے جانے والے ملزمان 2003 سے پولیس کی وردی میں وارداتیں کرتے تھے، ڈاکوؤں نے ڈاکٹر کے گھر سے کروڑوں روپے اور زیورات بھی لوٹے تھے۔

دوسری جانب ایس ایس پی آپریشنز پشاور مسعود احمد بنگش کا اس حوالے سے کہنا ہے کہ ہلاک چاروں ڈاکووں کی شناخت ہو گئی ہے، 3 ڈاکوؤں کا تعلق افغانستان سے ہے۔

مسعود احمد بنگش کا کہنا ہے کہ ہلاک ڈاکو پشاور، راولپنڈی، نوشہرہ اور دیگر اضلاع کی پولیس کو انتہائی مطلوب تھے، ڈاکوؤں نے حالیہ دنوں میں دو بڑی وارداتیں کی تھیں، ڈاکوؤں سے کلاشنکوف، رائفل، 2 پستول اور موٹر سائیکلیں برآمد ہوئی ہیں۔