وزیراعظم شہباز شریف کا موڈیز کی جانب سے بینکنگ شعبے کی ریٹنگ مستحکم قرار دیے جانے پر اطمینان کا اظہار

اسلام آباد: وزیرِ اعظم محمد شہباز شریف نے عالمی ریٹنگ ایجنسی موڈیز کی جانب سے پاکستان کے بینکنگ شعبے کی ریٹنگ کو "مستحکم" قرار دیے جانے پر اطمینان کا اظہار کیا ہے اور اسے ملکی معیشت کے درست سمت میں گامزن ہونے کا واضح ثبوت قرار دیا ہے۔

تفصیلات کے مطابق وزیراعظم ہاؤس کی جانب سے جاری بیان میں شہباز شریف نے کہا کہ پاکستان کی معیشت استحکام کے بعد اب ترقی کی راہ پر گامزن ہے۔

بیان میں وزیر اعظم کا مزید کہنا تھا کہ بین الاقوامی اداروں کی رپورٹس اور ریٹنگز اس بات کی عکاس ہیں کہ حکومت کی معاشی پالیسیاں درست سمت میں آگے بڑھ رہی ہیں۔

انہوں نے معاشی ٹیم کی کارکردگی کو سراہتے ہوئے کہا کہ پاکستان کے معاشی استحکام اور ترقی کے لیے ٹیم نے شب و روز محنت کی، جو قابل تحسین ہے۔

وزیراعظم کا مزید کہنا تھا کہ اللہ کے فضل و کرم سے پاکستان کی ترقی کا خواب شرمندہ تعبیر ہونے کے قریب ہے اور حکومت ملک کو پائیدار معاشی استحکام کی راہ پر گامزن رکھنے کے لیے پُرعزم ہے۔