بھارت براہ راست جنگ کی جرات نہیں کر سکتا، افغانستان کے ذریعے پراکسی وار لڑ رہا ہے، وزیر دفاع

اسلام آباد:وزیردفاع خواجہ محمد آصف نے کہاہے کہ حالیہ شکست کے بعد بھارت پاکستان کے ساتھ براہ راست جنگ کی جرات نہیں کر سکتااس لیے وہ افغانستان کو بیساکھی بنا کر ہمارے خلاف پراکسی وار لڑ رہا ہے۔

تفصیلات کے مطابق قومی اسمبلی میں اظہار خیال کرتے ہوئے وفاقی وزیر خواجہ محمد آصف نے کہا کہ ہمیں اس امر پر اتفاق کرنا ہو گا کہ ان حملوں کا مذہب اور فرقہ واریت سے کوئی تعلق نہیں بلکہ بھارت پاکستان کے خلاف افغانستان کا سہارا لے کر پراکسی وار لڑ رہا ہے۔

اپنی تقریر میں خواجہ آصف نے کہا کہ افغانستان میں ہم نے دونوں جنگ میں شرکت مذہبی بنیادوں پر نہیں کی۔،خواجہ آصف نے کہا کہ نائن الیون کا آج تک پتہ نہیں چل سکا کہ کس نے کرایا مگر اس میں کوئی افغان پشتون یا ہزارہ نہیں تھا اس کے باوجود ہم 2 دہائیوں تک کرائے پر دستیاب تھے۔

انہوں نے کہا کہ جب تک ماضی کی غلطیوں کا اعتراف نہیں کریں گے ہم آگے نہیں بڑھ سکتے، افغانستان میں پاکستان نے جہاد نہیں لڑا کیونکہ یہ ایک سپر پاور کی جنگ تھی جس کے بعد ہمیں استعمال کر کے پھینک دیا گیا،یہ اس وقت کے آمروں کا اپنے تسلط کو جواز فراہم کرنے کی کوشش تھی۔

اجلاس سے خطاب میں وزیر دفاع نے کہا کہ میں نے اسی ایوان میں اپنے باپ کے کئے کی معافی مانگی، اعجاز الحق نے پتہ نہیں اس ایوان میں میرے بارے میں کیا کہا۔

انہوں نے کہا کہ قائد اعظم نے اتحاد، تنظیم اور ایمان کہا مگر ہم نے ایمان، اتحاد تنظیم کردیا، ہم نے غیر ملکی حملہ آوروں کے ناموں پر سڑکوں کے نام رکھے۔

خواجہ آصف نے کہا کہ نائن الیون افغانستان نے نہیں کرایا مگر اس کے بعد ہم کرائے کی جنگ لڑتے رہے، ایک شخص نے امریکا کی خوشنودی کے لئے ملک کو امریکہ کی فرنٹ لائن سٹیٹ بنادیا۔

وزیر دفاع نے کہا کہ آج تک ہم اپنا نصاب واپس نہیں لا سکے اور اپنی پوری تاریخ تبدیل کی، امریکیوں نے ہمیں چھوڑ دیا لیکن ہمیں عقل نہیں آئی۔انہوں نے سوال کیا کہ ہم اپنے ہیروز کو اپنا ہیرو کیوں نہیں مانتے۔

خواجہ آصف کا کہنا تھا کہ اس مٹی کو اپنا اوریجن مانیں،کے کے عزیز کی کتاب ٹیکسٹ ہونی چاہیے،ان نسلوں نے وہ کتابیں نہیں پڑھی جو ہم نے پڑھی ہیں،مجھے اسلام کے کسی بھی  مسلک  سے کوئی اختلاف نہیں،میں کوئی اتنا پڑھا لکھا مسلمان نہیں،مجھے تھریٹس آئے، میرا فون بھرا ہوا ہے،مجھے سچ بولنا ہے بولوں گا جب ضرورت پڑی۔