پاکستان کی افغانستان میں کامیاب فضائی حملے، دہشت گردوں کے 7 ٹھکانے ملیا میٹ کر دیے

اسلام آباد:پاکستان نے ہفتہ اور اتوار کی درمیانی شب پاک افغان سرحد سے ملحقہ علاقے میں دہشت گردوں کے 7 ٹھکانوں کو کامیابی سے نشانہ بناتے ہوئے ملیا میٹ کردیے۔

تفصیلات کے مطابق وفاقی وزارتِ اطلاعات و نشریات نے کہا ہے کہ پاکستان نے انٹیلی جنس بنیادوں پر پاک افغان سرحدی علاقے میں کامیاب کارروائی کرتے ہوئے فتنہ الخوارج سے وابستہ طالبان اور اسلامک اسٹیٹ کے سات دہشت گرد کیمپوں کو نشانہ بنایا۔

 جاری کردہ بیان کے مطابق حالیہ حملوں، بالخصوص بنوں واقعے کی منصوبہ بندی افغانستان میں موجود خوارج قیادت کی ہدایت پر کی گئی۔ بیان میں کہا گیا کہ ان حملوں کی ذمہ داری افغانستان میں موجود پاکستانی طالبان، فتنہ الخوارج نے قبول کی ہے۔

جاری بیان میںوزارت اطلاعات نے مزید کہا کہ پاکستان نے متعدد بار افغان طالبان حکومت پر زور دیا کہ وہ اپنی سرزمین دہشتگرد تنظیموں اور پراکسی عناصر کے استعمال سے روکنے کیلئے قابلِ تصدیق اقدامات کرے، تاہم افغان عبوری حکومت اس سلسلے میں مؤثر کارروائی کرنے میں ناکام رہی۔

پاکستان نے دہشت گرد کیمپوں اور ٹھکانوں کو نہایت درستگی کے ساتھ نشانہ بنایا اور اس کارروائی کا مقصد غیر ملکی پراکسیز کو دہشت گرد سرگرمیوں کے لیے افغان سرزمین استعمال کرنے سے روکنا ہے۔

وزرات اطلاعات کا کہنا ہےکہ پاکستان نے اپنی شہریوں کی حفاظت کو یقینی بنانے کیلئے جوابی کارروائی کرتے ہوئے انٹیلی جنس معلومات کی بنیاد پر دہشت گردوں کے 7 کیمپس اور ٹھکانوں کو نشانہ بنایا، پاکستان خطے میں امن و استحکام کا خواہاں ہے، تاہم پاکستانی عوام کی سلامتی اولین ترجیح ہے۔

بیان میں وفاقی وزارت اطلاعات و نشریات نے مزید کہا کہ عالمی برادری طالبان پر دوحا معاہدہ کے تحت کیے گئے وعدوں کی پاسداری کے لیے زور دے، بیان میں کہا گیا کہ افغان سرزمین کو دیگر ممالک کے خلاف استعمال سے روکنا علاقائی اور عالمی سلامتی کے لیے ناگزیر ہے۔