ٹرمپ کی ایرانی رہنماؤں کو براہ راست نشانہ بنانے اور حکومت کا تختہ گرانے کی دھمکی،رائٹرز کا دعویٰ

ویب ڈیسک:برطانوی خبر رساں ادارے رائٹرز نے اپنی ایک تازہ رپورٹ میں دعویٰ کیا ہے کہ امریکی صدر ڈونلڈ ٹرمپ ایرانی رہنماؤں کو براہ راست نشانہ بنانے اور آیت اللہ خامنہ ای کی حکومت کا تختہ گرانے پر غور کر رہے ہیں۔

تفصیلات کے مطابق رائٹرز کی رپورٹ میں مزید کہا گیا ہے کہ ایران پر ممکنہ محدود حملوں کی اطلاعات سامنے آئی ہیں اور امریکی فوج ایرانی حکومت کا تختہ الٹنے کی کوشش بھی کر سکتی ہے۔ 

تاہم اس حوالے سے امریکی حکام کی جانب سے باضابطہ تصدیق یا تردید سامنے نہیں آئی۔

رپورٹ میں مزید کہا گیا ہے کہ ٹرمپ گزشتہ سال ایران کے سپریم لیڈر آیت اللہ خامنہ ای کو سخت بیانات اور دھمکیاں دے چکے ہیں، جس کے بعد دونوں ممالک کے تعلقات میں کشیدگی مزید بڑھ گئی تھی۔

دوسری جانب امریکی صدر ڈونلڈ ٹرمپ نے ایران کو 10 سے 15 دن کا الٹی میٹم دیتے ہوئے کہا ہے کہ اگر نیوکلیئر معاہدہ نہ کیا گیا تو اسے سنگین نتائج بھگتنا ہوں گے۔ ایئرفورس ون طیارہ میں میڈیا سے گفتگو کرتے ہوئے صدر ٹرمپ نے خبردار کیا کہ ایران کو چاہیے کہ وہ دس یا پندرہ دن میں معاہدہ کر لے، اور کہا کہ ایران کسی صورت ایٹمی ہتھیار نہیں رکھ سکتا۔

خیال رہے کہ گزشتہ روز صدر ٹرمپ نے بورڈ آف پیس کے پہلے اجلاس سے خطاب کے دوران بھی ایران سے کہا کہ وہ امریکہ کے ساتھ ایک مؤثر معاہدہ کرے۔