ایران کے اسرائیل کے مختلف علاقوں پر متعدد میزائل حملے، اسرائیلی صدر بال بال بچ گئے

تہران: امریکی و اسرائیلی جارحیت کے جواب میں ایران کی جانب سے اسرائیلی اور دیگر امریکی اہداف پر بھرپورمیزائل حملے جاری ہیں، حالیہ حملوں میں ایران نے اسرائیل کے متعدد شہروں کو نشانہ بنایا ،جبکہ حملوں میں اسرائیلی صدر اسحاق ہرزوگ ایرانی میزائیل حملے میں بال بال بچ گئے۔

ایرانی میڈیا رپورٹس کے مطابق پاسداران انقلاب نےکہا ہے کہ آپریشن وعدہ صادق 4 کے تحت حملوں کی نئی لہر کا آغاز کردیا، 78ویں لہر کے دوران خطے میں امریکی اہداف اور اسرائیل کو نشانہ بنایا گیا، ایلات، دیمونا اور شمالی تل ابیب سمیت مختلف اہداف پر ملٹی وارہیڈ میزائل اور ڈرونز کے ذریعے حملے کیے گئے۔

پاسداران انقلاب کا کہنا ہے کہ ان کارروائیوں میں عماد اور قدر میزائل استعمال کیے گئے جبکہ خطے میں امریکی فوجی اڈوں کو بھی نشانہ بنایا گیا، اب تک پاسداران انقلاب کی زیادہ تر جنگی یونٹس اور بسیج فورسز کو مکمل طور پر میدان میں نہیں اتارا گیا، تاہم ضرورت پڑنے پر انہیں بھی شامل کیا جائے گا۔

ایرانی پاسداران انقلاب کےختم الانبیابریگیڈ کے ترجمان نے ڈونلڈ ٹرمپ کا جملہ طنزا دہرایا کہ ٹرمپ یو آر فائرڈ، تھینک یو فاراٹینشن ٹو دِس میٹر۔

ادھر ایرانی فوج نےکہا کہ صدر ٹرمپ ٹیلیفون اورسوشل میڈیا سے اپنا سرہٹائیں اور اپنی آنکھوں کو آسمان، اسٹاک مارکیٹ اور تیل کی قیمتوں پر مرکوز کریں، ایران بڑا سرپرائز دینے والا ہے۔

قبل ازیں اسرائیلی وزیراعظم کا امریکی صدر سے ٹیلیفونک گفتگو کے بعد میڈیا پر پیغام میں کہنا تھا کہ ڈیل ہونے تک ایران اور حزب اللّٰہ پر حملے جاری رکھیں گے،یتن یاہو نے کہا کہ امریکا اور ایران امن بات چیت کرتے ہیں تو اسرائیل اپنے مفادات کا تحفظ کرے گا، صدر ٹرمپ سمجھتے ہیں جنگ کے تمام مقاصد معاہدے سے حاصل کیے جاسکتے ہیں، ایسا معاہدہ ہمارے مفادات کا تحفظ کرے گا۔

دوسری جانب صہیونی میڈیا نے دعویٰ کیا ہے کہ ایران نے حالیہ میزائل حملوں میں اسرائیلی صدر کو نشانہ بنایا ہے تاہم وہ اس حملے میں بال بال بچ گئے ہیں۔

اسرائیلی میڈیا کے مطابق اسرائیلی صدر شمالی اسرائیل میں موجود تھے جب پہاڑی پر میزائل گرا، اسرائیلی صدر شمونہ کریات میں نیوز کانفرنس کررہے تھے۔

خیال رہے کہ کل سوشل میڈیا پلیٹ فارم ٹروتھ سوشل پر جاری اپنے بیان میں صدر ٹرمپ نے کہا کہ مجھے بتاتے ہوئے خوشی ہورہی ہے کہ امریکا اور ایران کے درمیان گزشتہ 2 دنوں کے دوران نہایت مثبت اور نتیجہ خیز بات چیت ہوئی ہے، جس کا مقصد مشرق وسطیٰ میں جاری کشیدگی کا مکمل اور حتمی حل تلاش کرنا ہے۔

تاہم ایران کی جانب سے ٹرمپ کے ان دعوؤں کی سختی سے تردید کی گئی تھی اور ایرانی پارلیمنٹ کے اسپیکر باقر قالیباف نے کہا تھا کہ ایران کی جانب سے امریکہ کے ساتھ کسی قسم کے کوئی مذاکرات نہیں ہو رہے ، ان کا کہنا تھا کہ ٹرمپ کا یہ بیان محض دھوکے کے سوا کچھ نہیں ہے جس کا مطلب بڑھتی ہوئی تیل کی قیمتوں اور روکنا اور ڈوبتی ہوئی امریکی معیشت کو سہار ا دینا ہے۔