وزیراعظم کا ٹیلی کمیونیکیشن شعبے میں بیرونی سرمایہ کاری اور آمدن میں خاطر خواہ اضافے پر اطمینان کا اظہار

اسلام آباد: عالمی یومِ ٹیلی مواصلات و معلوماتی معاشرہ کے موقع پراپنے پیغام میں وزیراعظم محمد شہباز شریف نے پاکستان میں ٹیلی کمیونیکیشن کے شعبے سے وابستہ تمام افراد، ماہرین ، اداروں، شراکت داروں اور بین الاقوامی معاونین کو ان کے پیشہ ورانہ عزم پرخراج تحسین پیش کیا ہے۔

تفصیلات کے مطابق وزیراعظم نےکہاکہ پاکستان کا ڈیجیٹل انفراسٹرکچر تیزی سے ترقی کر رہا ہے۔ ملکی تکنیکی آلات اور وسائل کے اثاثوں میں دود لاکھ 34ہزار کلومیٹر سے زائد فائبر آپٹک بیک بون، جدید 6 سب میرین کیبلز، 58 ہزار سیلولر ٹاورز اور 20 سے زائد جدید ڈیٹا سینٹرز شامل ہیں۔ یہ تمام سہولیات ملک کے 205 ملین صارفین کو بہترین ڈیجیٹل خدمات فراہم کر رہی ہیں۔

وزیراعظم نےکہاکہ پاکستان میں آئی ٹی کی سالانہ برآمدات 3.8 ارب ڈالر تک پہنچ گئی ہیں۔آئی ٹی اور سافٹ ویئر ٹیکنالوجی پارکس اور معاون انفراسٹرکچر، نوجوان اور ٹیکنالوجی سے آراستہ افرادی قوت کے ذریعے پاکستان اس صنعت میں ایک عالمی آئی ٹی مرکز کے طور پر اپنی حیثیت مستحکم کررہا ہے۔

محمد شہباز شریف نے کہاکہ نیشنل اے آئی پالیسی 2025 اورحالیہ 5G سپیکٹرم کی کامیاب اور شفاف نیلامی بلا شبہ "ڈیجیٹل پاکستان‘‘ کی جانب اہم سنگِ میل ہے۔