عوام کیلئے بڑا ریلیف پیکج، وزیر اعظم نے پٹرول اور ڈیزل 22،22روپے سستا کر دیا

اسلام آباد: وزیر اعظم شہبا ز شریف نے عید کے تیسرے روز عوام کو ریلیف دیتے ہوئے پٹرولیم مصنوعات کی قیمتوں میں نمایاں کمی کا اعلان کر دیا۔

تفصیلات کے مطابق حکومت کی جانب سے پیٹرول اور ڈیزل کی فی لیٹر قیمت میں 22، 22 روپے کی کمی کی گئی ہے،پیٹرولیم مصنوعات کی قیمتوں میں کمی کا اطلاق رات 12 بجے سے ہو گا۔

وزیر اعظم ہاؤس سے جاری کردہ اعلامیہ میں کہا گیا کہ وزیر اعظم نے قوم سے وعدہ کیا تھا جیسے ہی گنجائش پیدا ہو گی، ریلیف دیا جائے گا۔ اور شہباز شریف نے اس وعدے پر ہو بہو عمل کیا۔

وزیر اعظم شہباز شریف نے کہا کہ عوام کو ریلیف دینا میری اولین ترجیحات میں شامل ہے۔اعلامیہ میں کہا گیا کہ پچھلے ہفتے بھی پیٹرول اور ڈیزل کی قیمتوں میں کمی کی گئی تھی۔ اور وفاقی حکومت نے سخت ترین حالات میں بھی ریلیف کا سلسلہ جاری رکھا۔ پبلک، گڈز ٹرانسپورٹ، موٹر سائیکل اور رکشہ والوں کو فیول پر سبسڈی دی گئی۔

اعلامیہ میں کہا گیا کہ خطے کے دوسرے ممالک میں پیٹرول کے لیے قطاریں لگی ہوئی تھیں۔ لیکن وزیر اعظم کے بروقت اقدامات کی بدولت پاکستان میں پیٹرول اور ڈیزل دستیاب تھا۔