آزاد کشمیر :ضلع حویلی میں رکشہ گہری کھائی میں جا گرا،7 افراد جاں بحق

حویلی :آزاد کشمیر کے ضلع حویلی میں کھائی میں رکشہ گرنے کے واقعے میں جاں بحق افراد کی تعداد 7 ہوگئی۔

میڈیا رپورٹس کے مطابق ریسکیو حکام نے بتایا کہ یہ حادثہ جمعرات کی شام  حویلی کہوٹہ کے علاقے خورشید آباد میں س وقت پیش آیا جب سیاحوں کو لے جانے والا ایک لوڈر رکشہ تفریحی سفر سے واپسی کے دوران مانا موڑ کے مقام پر بے قابو ہو کر گہری کھائی میں جا گرا۔

حکام کے مطابق زخمیوں کی حالت تشویشناک ہونے کے باعث انہیں بعد ازاں پاکستان انسٹیٹیوٹ آف میڈیکل سائنسز منتقل کیا گیا جہاں وہ دوران علاج دم توڑ گئے، جس کے بعد جاں بحق افراد کی تعداد 7 ہوگئی ہے۔

دوسری جانب اس افسوسناک حادثے  پر وزیرِ اعظم آزاد کشمیر فیصل ممتاز راٹھور نے سانحے پر ضلع حویلی میں ایک روزہ سوگ کا اعلان کرتے ہوئےحادثے کی رپورٹ طلب کر لی ۔

انہوں نے کہا ہے کہ حکومت دکھ کی گھڑی میں متاثرین کے ساتھ کھڑی ہے۔