بھارت میں پابندی کے باوجود دلجیت دوسانجھ کی فلم 'ستلج' کی نمائش جاری، عالمی سطح پر بھی تنازع شدت اختیار کر گیا

لاہور: بھارتی پنجابی گلوکار اور اداکار دلجیت دوسانجھ کی فلم 'ستلج' ایک بار پھر خبروں کی زینت بن گئی ہے۔ بھارت میں فلم پر عائد پابندی اور او ٹی ٹی پلیٹ فارم سے ہٹائے جانے کے باوجود مختلف ممالک میں اس کی خصوصی نمائشوں کا سلسلہ جاری ہے، جس کے بعد فلم ایک مرتبہ پھر عالمی سطح پر توجہ کا مرکز بن گئی ہے۔

فلم میں سکھ برادری کے خلاف مبینہ بھارتی مظالم اور تاریخی واقعات کو موضوع بنایا گیا ہے۔ یہی وجہ ہے کہ ریلیز کے بعد سے فلم بھارت میں شدید تنازع کا شکار رہی۔ بعض حلقوں نے فلم کو متنازع قرار دیتے ہوئے اس کی نمائش روکنے کا مطالبہ کیا، جبکہ سکھ تنظیموں اور انسانی حقوق کے کارکنوں نے اسے تاریخ کے ایک اہم باب کو اجاگر کرنے کی کوشش قرار دیا۔

تازہ اطلاعات کے مطابق بھارت میں فلم کو متعدد پلیٹ فارمز سے ہٹائے جانے کے باوجود بیرونِ ملک مختلف شہروں میں خصوصی شوز منعقد کیے جا رہے ہیں۔ فلم کے حامیوں کا مؤقف ہے کہ پابندی کے بجائے ناظرین کو خود فیصلہ کرنے کا حق دیا جانا چاہیے، جبکہ ناقدین اسے حساس موضوع قرار دیتے ہوئے اس کی نمائش پر اعتراضات برقرار رکھے ہوئے ہیں۔

دوسری جانب فلم کو بین الاقوامی او ٹی ٹی پلیٹ فارم سے بھی ہٹائے جانے کی اطلاعات سامنے آئی ہیں، جس کے بعد اظہارِ رائے کی آزادی، فنکاروں کے حقوق اور سنسرشپ کے حوالے سے نئی بحث چھڑ گئی ہے۔ 

تجزیہ کاروں کا کہنا ہے کہ پابندیوں کے باوجود فلم مسلسل خبروں میں رہنے کی وجہ سے عالمی توجہ حاصل کر رہی ہے۔ جبکہ آئندہ دنوں میں اس معاملے پر مزید قانونی اور عوامی پیش رفت سامنے آنے کا امکان بھی ظاہر کیا جا رہا ہے۔