11واں کلر اینڈ کیم ایکسپو18 جولائ سے لاہور میں منعقد ہوگی

لاہور: پاکستان کی ڈائز، کیمیکلز اور متعلقہ صنعتوں کی سب سے بڑی اور ممتاز نمائش 11واں کلر اینڈ کیم ایکسپو 2026 18 اور 19 جولائی 2026 کو لاہور انٹرنیشنل ایکسپو سینٹر میں منعقد ہوگی۔ ایونٹ اینڈ کانفرنس انٹرنیشنل (پرائیویٹ) لمیٹڈ کی جانب سے رین بو گروپ اور پنجاب ڈائز اینڈ کیمیکلز مرچنٹس ایسوسی ایشن (PDCMA) کے اشتراک سے منعقد ہونے والی یہ دو روزہ نمائش کیمیکلز اور متعلقہ صنعتوں کے لیے ملک کا جامع ترین کاروباری پلیٹ فارم ثابت ہوگی۔

صوبائی وزیر صنعت، تجارت و سرمایہ کاری، حکومتِ پنجاب، شافع حسین، اس تقریب میں بطور مہمانِ خصوصی شرکت کریں گے، جو صنعتی ترقی، سرمایہ کاری کے فروغ اور پاکستان کے مینوفیکچرنگ شعبے میں جدید ٹیکنالوجی کے فروغ کے لیے حکومتِ پنجاب کے عزم کی عکاسی کرتا ہے۔

ایکسپو ہر روز صبح 10 بجے سے شام 6 بجے تک جاری رہے گا، جہاں پیشگی رجسٹریشن کروانے والے تجارتی اور کارپوریٹ زائرین کے لیے داخلہ مفت ہوگا۔ نمائش میں 300 سے زائد قومی و بین الاقوامی نمائش کنندگان ڈائز، کیمیکلز اور متعلقہ صنعتوں سے وابستہ جدید ترین مصنوعات، ٹیکنالوجیز اور جدید حل پیش کریں گے۔ توقع ہے کہ اس ایونٹ میں پاکستان سمیت بیرونِ ملک سے ہزاروں کاروباری شخصیات، صنعت کار، درآمد کنندگان، برآمد کنندگان، ڈسٹری بیوٹرز، محققین، پالیسی ساز، سرمایہ کار اور دیگر متعلقہ شعبوں سے وابستہ افراد شرکت کریں گے۔

نمائش کے ساتھ ساتھ ڈیجیٹل ٹیکسٹائل پرنٹنگ انڈسٹری ایکسپو (DTPIE) بھی منعقد کیا جائے گا، جہاں شرکا کو ڈیجیٹل ٹیکسٹائل پرنٹنگ، اسکرین پرنٹنگ، ٹیکسٹائل پروسیسنگ، فنشنگ ٹیکنالوجیز اور صنعتی آٹومیشن میں ہونے والی جدید پیش رفت سے آگاہی حاصل کرنے کا موقع ملے گا۔

نمائش میں ٹیکسٹائل کیمیکلز، ڈائز اور انٹرمیڈیٹس، پگمنٹس، پرنٹنگ ٹیکنالوجیز، پینٹس اور کوٹنگز، فارماسیوٹیکل کیمیکلز، فوڈ کیمیکلز، زرعی کیمیکلز، کھادیں، پیٹروکیمیکلز، ڈٹرجنٹس، لیدر کیمیکلز، واٹر ٹریٹمنٹ، اسپیشلٹی کیمیکلز، لیبارٹری آلات، صنعتی مشینری اور ماحولیاتی ٹیکنالوجیز سمیت متعدد شعبوں کی نمائندگی کی جائے گی۔

2016 میں آغاز کے بعد سے کلر اینڈ کیم ایکسپو پاکستان کی ڈائز اور کیمیکلز انڈسٹری کے لیے ملک کا نمایاں بزنس ٹو بزنس (B2B) پلیٹ فارم بن چکا ہے، جو تجارت، ٹیکنالوجی کی منتقلی، سرمایہ کاری کے مواقع اور اسٹریٹجک شراکت داریوں کے فروغ میں اہم کردار ادا کر رہا ہے۔ اس سال نمائش کا گیارہواں ایڈیشن صنعتی شراکت داری کو مزید مضبوط بنانے کے ساتھ ساتھ مینوفیکچرنگ اور صنعتی ترقی کے مستقبل کی تشکیل دینے والی جدید اختراعات کو بھی اجاگر کرے گا۔

تقریب سے قبل گفتگو کرتے ہوئے منتظمین نے کہا کہ یہ نمائش پاکستان کے صنعتی شعبے کی بڑھتی ہوئی استعداد اور مضبوطی کی عکاس ہے اور مقامی و بین الاقوامی کمپنیوں کے لیے نئی مصنوعات متعارف کرانے، کاروباری روابط کو وسعت دینے اور ابھرتے ہوئے مارکیٹ مواقع سے فائدہ اٹھانے کا بہترین پلیٹ فارم فراہم کرتی ہے۔

منتظمین نے صنعت سے وابستہ تمام اسٹیک ہولڈرز، کارپوریٹ ایگزیکٹوز، صنعت کاروں، خریداروں، ماہرینِ تعلیم اور میڈیا نمائندگان کو اس اہم ایونٹ میں شرکت کی دعوت دیتے ہوئے کہا کہ وہ پاکستان کی ڈائز اور کیمیکلز انڈسٹری میں ہونے والی جدید ترین پیش رفت کا قریب سے مشاہدہ کریں۔

تجارتی زائرین سے درخواست کی گئی ہے کہ وہ نمائش میں آسان اور بلا تعطل داخلے کے لیے پیشگی آن لائن رجسٹریشن مکمل کرلیں۔