لندن کی تقریب میں پاکستانی اداکارہ چھا گئیں، تصاویر اور ویڈیوز وائرل

ویب ڈیسک: پاکستان کی معروف اداکارہ ماہرہ خان نے برطانیہ کے دارالحکومت لندن میں غزہ کے متاثرین کے لیے منعقدہ ایک خیراتی تقریب میں شرکت کرکے امدادی سرگرمیوں سے اظہارِ یکجہتی کیا۔

وسطی لندن کے لندن میریٹ ہوٹل گروسوینر اسکوائر میں ہونے والی تقریب میں برطانوی پاکستانی کمیونٹی، مخیر حضرات اور فلسطینی عوام کے حامی افراد نے بڑی تعداد میں شرکت کی۔

تقریب کا اہتمام ہارون رشید نے غیر سرکاری تنظیم فورگاٹن ویمن کے تعاون سے کیا، جس کا مقصد غزہ میں جاری انسانی بحران سے متاثرہ افراد کے لیے امدادی فنڈ جمع کرنا تھا۔

ماہرہ خان کی تقریب میں آمد شرکا کی توجہ کا مرکز بنی، جبکہ ان کی تصاویر اور ویڈیوز سوشل میڈیا پر بھی تیزی سے وائرل ہوگئیں۔ اداکارہ نے تقریب کے شرکا اور مداحوں سے ملاقات کی اور امدادی مہم کی حمایت کا اظہار کیا۔

رپورٹس کے مطابق تقریب کے دوران تقریباً ایک لاکھ چار ہزار برطانوی پاؤنڈ جمع کیے گئے، جو غزہ میں جنگ سے متاثرہ فلسطینیوں کو انسانی امداد کی فراہمی پر خرچ کیے جائیں گے۔

واضح رہے کہ چند ہفتے قبل بھی ماہرہ خان نے برٹش ایشین ٹرسٹ کی سالانہ تقریب میں پاکستان کی نمائندگی کرتے ہوئے شرکت کی تھی، جہاں ان کی ملاقات برطانیہ کے بادشاہ چارلس سوم سے ہوئی تھی۔

سوشل میڈیا پر صارفین نے ماہرہ خان کے اس اقدام کو سراہتے ہوئے کہا کہ معروف شخصیات کی ایسی سرگرمیاں نہ صرف امدادی مہمات کو تقویت دیتی ہیں بلکہ ضرورت مند افراد کی مدد کے لیے عوام کو بھی متحرک کرتی ہیں۔